ГАЗРЫН АЛБА

 

ЧИНГЭЛТЭЙ ДҮҮРГИЙН ГАЗАР ЗОХИОН БАЙГУУЛАЛТЫН АЛБА

Чингэлтэй дүүрэг нь анх “Засаг захиргаа нутаг дэвсгэрийн нэгж, түүний удирдлагын тухай” хуулийн дагуу Улсын Их хурлын 1992 оны 18 дугаар тогтоолоор нийслэлийн томоохон район болох Сүхбаатарын районыг Чингэлтэй, Сүхбаатар хэмээх хоёр дүүрэг болгон салгаж зохион байгуулахаар тогтоосон байдаг.

Дээрх тогтоолыг үндэслэн Улаанбаатар хотын АДХ-ын Тэргүүлэгчдийн 1992 оны 09 дүгээр сарын 1-ны өдрийн 31 дүгээр тогтоолоор Чингэлтэй дүүргийг үүсгэн байгуулах, дүүргийн засаг захиргаа, нутаг дэвсгэрийн үндсэн нэгж болох хороог 18 байхаар шийдвэрлэжээ.

Чингэлтэй дүүргийн Газар зохион байгуулалтын алба нь 1992 онд Чингэлтэй дүүргийн Засаг даргын Тамгын газрын Хот тохижилтын хэлтэст газар эдэлбэр хариуцсан газар зохион байгуулагчаар Ц.Жаргалыг томилсноор эхэлжээ. Уг албан тушаалд 1992-1995 онд Ц.Жаргал, 1995-2000 онд Б.Цэнгэл нар ажиллаж байсан бөгөөд 2000 онд Чингэлтэй дүүргийн Засаг даргын Тамгын газрын дэргэд “Чингэлтэй дүүргийн Газрын харилцааны алба” нэртэйгээр байгуулагдаж даргаар нь Б.Цэнгэл, хот байгуулалтын мэргэжилтэн н.Эрдэнэбаяр, Газар зохион байгуулагчаар Д.Баярсайхан, Төлбөрийн байцаагчаар н.Энхбаяр нар томилогдон 4 хүний бүрэлдэхүүнтэй газрын харилцааны чиглэлээр үйл ажиллагаагаа явуулж эхэлсэн. Тус албаны даргаар 2000-2002 онд Б.Цэнгэл, 2002-2003 онд Г.Батбаяр, 2003-2005 онд Б.Пүрэвсүрэн, 2005-2008 онд Ч.Батбилэг, 2008-2010 онд Э.Болорчулуун, 2010-2014 онд Ч.Очир, 2014-2016 онд М.Алтансүх, 2016-2020 онд Ж.Мөнх-Эрдэнэ нар тус тус ажиллаж байсан бөгөөд 2020 оноос Н.Оюунбилэг ажиллаж байна.

Чингэлтэй дүүрэг нь Улаанбаатар хотын хоймрыг эзлэн Баянгол, Сүхбаатар, Сонгинхайрхан дүүрэгтэй хил залгаа оршдог. 2019 оны нэгдмэл сангийн тайлангаар Чингэлтэй дүүрэг нь 8930 га нутаг дэвсгэртэй.

Үүнээс  810.6 га (9.07%) газар нь  хөдөө аж ахуйн,  3415.9 га (38.3%) газар нь хот тосгон бусад суурин,  120.1 га (1.33%) газар нь зам, шугам сүлжээ,  197.9 га (2.2%) газар нь ойн сан бүхий газар,

 6.0 га (0.07%) газар нь усан сан бүхий газар,  4379.3 га (49.1%) газар нь улсын тусгай хэрэгцээний

 газар байна.   Тус дүүрэг нь 40548 өрхийн 1590451 хүн ам оршин суудаг. Засаг захиргааны анхан шатны эгж 19 хороотой үүнээс 6 хороо нь орон сууцны хороолол, 13 хороо нь гэр хороолол юм.

ЭРХЭМ ЗОРИЛГО: Монгол Улсын “Газрын тухай”, “Монгол Улсын иргэнд газар өмчлүүлэх тухай” хууль Газрын харилцаа, геодези зураг зүйн болон бусад холбогдох хууль тогтоомжийг дүүргийн нутаг дэвсгэрт хэрэгжүүлэх ажлыг зохион байгуулах, Нийслэл, дүүргийн Засаг даргын мөрийн хөтөлбөр, Засгийн газрын бодлого, үйл ажиллагааны чиглэлийг тодорхойлоход мэргэжлийн дэмжлэг үзүүлж, тэдгээрийн шийдвэрийг хэрэгжүүлэхэд оршино.

ҮЙЛ АЖИЛЛАГААНЫ ЧИГЛЭЛ: Төрийн үйлчилгээг иргэн бүрт шуурхай хүргэх, холбогдох хууль тогтоомжийн дагуу Монгол Улсын иргэнд газар өмчлүүлэх, эзэмшүүлэх, ашиглуулах ажлыг зохион байгуулах, газрын төлбөрийг орон нутгийн төсөвт төвлөрүүлэх, газрын зөрчил маргааныг шийдвэрлэх, газрын кадастр хөтлөх зэрэг болно.

АЛБАНЫ БҮТЭЦ: Чингэлтэй дүүргийн Газар зохион байгуулалтын алба нь албаны дарга, ахлах мэргэжилтэн, газар зохион байгуулагч-4, бүртгэлийн мэргэжилтэн, газар өмчлөлийн мэргэжилтэн-2, төлбөрийн байцаагч-2, санхүүгийн ажилтан, архив бичиг хэргийн ажилтан, журмын хашааны сахиул зэрэг нийт 13 хүний бүрэлдэхүүнтэй үйл ажиллагаагаа явуулж байна.

ЧИНГЭЛТЭЙ ДҮҮРГИЙН ГАЗАР ЗОХИОН БАЙГУУЛАЛТЫН АЛБАНЫ ХАМТ ОЛОН

 

ОНЦЛОХ БҮТЭЭН БАЙГУУЛАЛТЫН АЖИЛ:

Улаанбаатар хотод ахмад настан, залуучууд амрах, чөлөөт цагаа өнгөрүүлэх, тоглож наадах газар тун ховор. Чингэлтэй дүүрэг Улаанбаатар хотод анхдагч, жишиг болохуйц томоохон бүтээн байгуулалт хийсээр байна.

Үүнд: Чингэлтэй дүүрэг нь иргэдийнхээ хөгжилд чиглэсэн бүтээн байгуулалтын ажлуудыг үе шаттай хэрэгжүүлж иргэдэд спортоор хичээллэх дадал  зуршлыг олгох зорилгоор Улсын төсвийн хөрөнгөөр дүүргийн 10 дугаар хороонд усан бассейн,  олон  улсын  стандартад нийцсэн хоккейн талбай, сагсан бөмбөг, теннис, бөхийн спорт зэрэг спортын 8 төрлийн уралдаан, тэмцээнийг зэрэг зохион байгуулах хүчин чадал бүхий танхимууд, 1000 хүний суудалтай спорт цогцолборыг бүтээн байгуулж ашиглалтанд оруулаад байна.

/10-р хорооны Спорт цогцолбор/

Иргэдийн хөгжлийг дэмжих “Хөгжлийн төв”, биеийн тамир, спортоор хичээллэх дадал зуршлыг нэмэгдүүлэх, эрүүл амьдралын  хэв  маягийг бүрдүүлэх, спортын тэмцээн, уралдаан зохион байгуулах хөл бөмбөг,  хөнгөн  атлетик, спортын талбай, соёл  урлагийн  арга  хэмжээ  зохион  байгуулах  “Эрдмийн  задгай  театр”- ыг нийслэлийн хоймор болсон Чингэлтэй хайрханы өвөр бэлд орших “Эрдмийн цэцэрлэгт хүрээлэн”-д  цогцлоосон  билээ.  “Эрдмийн  цэцэрлэгт  хүрээлэн”  нь  30  гаруй  нэр  төрлийн 70.000 мод, бут, сөөг бүхий 80 мянган га талбай ногоон орчин бүхий нийслэлийн хөгжилд өнгө нэмсэн томоохон бүтээн байгуулалт болж байна. Энэ бүтээн байгуулалтын ажилд манай хамт олон, үе үеийн дарга удирдлагууд дүүргийн харъяа хэлтэс албадаа манлайлан оролцсоныг тэмдэглэхэд таатай байна.

/19-р хорооны Эрдмийн цэцэрлэгт хүрээлэн/

Чингэлтэй дүүргийн 4 дүгээр хорооны нутаг дэсгэрт гадаад хэргийн яамны газар эзэмших эрхийн  эвдэрсэн газрыг тохижуулж хүүхдийн тоглоомын талбай байгууллаа.

Албаны хаяг, утас, вэб сайт

Хаяг: Улаанбаатар хот, Чингэлтэй дүүргийн 1-р хороо, Энхтайваны өргөн чөлөө гудамж, нийслэлийн засаг захиргааны 4-р байр. Шуудангийн хаяг: 13330 Улаанбаатар хот, Чингэлтэй дүүрэг, 1 дүгээр хороо

Утас: 321224 319857

Факс: (976-11) 319857

http://www.gazar.ub.gov.mn//

2018 ОНЫ ЖИЛИЙН ЭЦСИЙН ҮЙЛ АЖИЛЛАГААНЫ ТАЙЛАН

 

2018 ОНЫ ХАГАС ЖИЛИЙН ҮЙЛ АЖИЛЛАГААНЫ ТАЙЛАН

Та үйл ажиллагааны тайланд үнэлгээ өгнө үү!
132  · 32 
Vote
  • Facebook