“Хотоо угаая" уриатай хаврын бүх нийтийн их цэвэрлэгээний ажлын хүрээнд Чингэлтэй дүүргийн Тохижилт Нийтийн аж ахуйн хэлтэс, "Тохижилт үйлчилгээ" ХХК, "Найши" трейд ХХК-иуд нийтийн эзэмшлийн гудамж, зам талбайн цэвэрлэгээ үйлчилгээ, далан суваг, гуу жалга дагуух түүвэр цэвэрлэгээг нийт 28 хүний бүрэлдэхүүнтэй, ногоон байгууламжийн түүвэр цэвэрлэгээг нийт 35 хүний бүрэлдэхүүнтэй тус тус цэвэрлэн ажиллаж байна.

Мөн дүүргийн Засаг даргын баталсан нэгдсэн удирдамж, төлөвлөгөө, хуваарийн дагуу нийтийн эзэмшлийн хөшөө дурсгал, хайс хашлага, сандал, хогийн савыг угаах, ногоон байгууламжийг сэргээн цэвэрлэлээ. 

“Хотоо угаая" уриатай хаврын бүх нийтийн их цэвэрлэгээний ажлын хүрээнд Чингэлтэй дүүргийн 13 хорооны "Пунцагцогчинлин" хийд өөрийн эзэмшлийн хашаа, гадна зам талбайн цэвэрлэгээг хийж байна.

Хүүхэд хамгааллын бодлогын жишиг баримт бичгийн хүрээнд албан хаагчдын гэр бүлийн тогтвортой байдлыг бэхжүүлэх, ажил амьдралын тэнцвэрт байдлыг хангах, хүүхдийн эрх зөрчигдөхөөс урьдчилан сэргийлж, сурч боловсрох, хөгжих эрүүл аюулгүй орчинг бүрдүүлэхэд дэмжлэг үзүүлж ажиллах чиг үүрэг бүхий “Байгууллагын дэргэдэх эцэг эхийн зөвлөл”-ийг дүүргийн Засаг даргын Тамгын газрын даргын тушаалаар байгуулсан.

Энэ хүрээнд “Байгууллагын дэргэдэх эцэг эхийн зөвлөл”-ийн 2024 оны үйл ажиллагааны төлөвлөгөөнд тусгагдсаны дагуу өнөөдөр дүүргийн Иргэдийн Төлөөлөгчдийн хурал, Засаг даргын Тамгын газар, 1-24 дүгээр хороодын албан хаагчдын хүүхдүүд “Чингис хааны музей”-г үзэж сонирхлоо.

Чингэлтэй дүүргийн 2 дугаар хороонд зөвшөөрөлгүй барьсан 15 гараашийг буулган, газар чөлөөлөх ажлыг эхлүүллээ.

Иргэдийн эрүүл, аюулгүй орчинд амьдрах эрхийг хангах, газар ашиглалтыг сайжруулах, явган хүний зам, талбайн хүрэлцээ хангамжийг нэмэгдүүлэх, авто замын түгжрэлийг бууруулах, тохижилтын ажил гүйцэтгэх боломжийг бүрдүүлэх зорилгоор Чингэлтэй дүүрэгт газар чөлөөлөлтийн ажил эрчимтэй хийгдэж байна.

 Энэ онд дүүргийн 9 байршилд 63 гарааш, 27 байршилд 1737 метр хашаа хайс чөлөөлөх юм. 

Бүгд Найрамдах Хонгконг улсад 2024 оны 03 дугаар сарын 29-ний өдөр зохион байгуулагдсан “INTERACT CUP MONGOLIA” “3х3” Сагсан бөмбөгийн тэмцээнд дүүргийн Ерөнхий боловсролын 23 дугаар сургуулийн баг тамирчид оролцлоо.

Дүүргийн Засаг даргын Тамгын газрын дэмжлэгтэйгээр оролцсон тус тэмцээнд Ерөнхий боловсролын 23 дугаар сургуулийн Биеийн тамирын багш Д.Одмаагаар ахлуулсан “INTERACT CLUB”-ийн баг тамирчид амжилттай оролцож, багаараа Алтан медаль хүртсэн ба Сурагч Б.Буянтогтох “Шилдэг тоглогч”-оор шалгарлаа.

Төрийн үйлчилгээг иргэдэд хурдан шуурхай, чирэгдэлгүй хүргэх боломжийг бүрдүүлж Чингэлтэй дүүрэг 24 хорооддоо “Хурдан” цэгийг нэвтрүүллээ.

Ингэснээр нийслэлийн 9 дүүргээс Чингэлтэй дүүрэг бүх хороондоо төрийн цахим үйлчилгээний “ХУРДАН” цэгийг нэвтрүүлсэн хамгийн анхны дүүрэг болж, иргэд төрийн үйлчилгээг хамгийн ойроос буюу хорооны байрнаас авах боломжтой боллоо.

“ХУРДАН” цэгийн үйлчилгээг бүх хороодод нэвтрүүлж буй өнөөдрийн арга хэмжээнд Цахим хөгжил, харилцаа холбооны сайд Н.Учрал, Улсын их хурлын гишүүн М.Оюунчимэг, Чингэлтэй дүүргийн Засаг дарга Н.Батсүмбэрэл нар оролцлоо.

Дүүргийн иргэд өмнө нь төрийн үйлчилгээг авахдаа  Төв шуудангийн “ХУРДАН” цэг, Чингэлтэй дүүргийн нэг цэгийн үйлчилгээ зэрэг зайлшгүй хотын төврүү явж 8 км замыг туулж, 2-3 цагийг зарцуулдаг байсан бол өнөөдрөөс эхлэн хорооныхоо байрнаас өөрт тохирох үйлчилгээг түргэн шуурхай авдаг болж цаг хугацаа, эдийн засгаа хэмнэх боломж бүрдэж байна.

“ХУРДАН” цэгээс иргэд

нийгмийн даатгалын шимтгэл төлөлтийн талаарх тодорхойлолт,
иргэний үнэмлэхийн лавлагаа, иргэний оршин суугаа газрын хаягийн бүртгэлийн лавлагаа,
авто тээврийн хэрэгслийн торгуулийн мэдээлэл,
жолоочийн лавлагаа, мэдээлэл,
эрүүл мэндийн даатгалын төлөлт шалгах,
жолоодох эрхийн оноо,
шинжилгээний хариу авах,
зээлийн мэдээллийн лавлагаа,
үл хөдлөх эд хөрөнгөтэй эсэх лавлагаа,
хуулийн этгээд улсын бүртгэлд бүртгэлтэй эсэх лавлагаа
иргэний үнэмлэх дахин авах,
ажилгүйдлийн тэтгэмж авах хүсэлт зэрэг төрийн 43 байгууллагын 478 төрлийн үйлчилгээнүүдийг нэг дороос авах боломжтой.
Өнөөдрийн байдлаар төрийн үйлчилгээг И-Монгол гар утасны аппликейшн, операторын системээр иргэдэд хүргэж байгаа бөгөөд тун удахгүй төрийн үйлчилгээний хөдөлгөөнт “ХУРДАН” цэг, өөртөө үйлчлэх 24 цагийн “ХУРДАН” цэгийг нэвтрүүлэхээр төлөвлөн ажиллаж байна.

Мөн төр, хувийн хэвшлийн хамтын ажиллагааны хүрээнд 4, 5 дугаар сард багтаан хүн амын төвлөрөл ихтэй зах, худалдаа үйлчилгээний төвүүдэд хувийн хэвшлийн киоск машиныг улсын хэмжээнд байршуулахаар ажиллаж байна.

Чингэлтэй дүүргийн 24 хороод “Хурдан” цэгийн үйлчилгээг нэвтрүүлсэн энэхүү үйл ажиллагааг өнөөдөр нэгэн зэрэг бүх хороодод зохион байгуулж иргэдэд мэдээлэл өгч, “Хурдан” цэгийн үйл ажиллагааг албан ёсоор бүх хорооддоо нэвтрүүлэн ажиллаж эхэллээ.

Чингэлтэй дүүргийн Засаг даргын Тамгын газар, Хэсэгчилсэн инженерийн хангамжийн удирдах газар ОНӨААТҮГ-ын Сайжруулсан шахмал түлшний хэлтэстэй хамтран угаарын хийн эрсдэлээс урьдчилан сэргийлэх сургалт зохион байгууллаа.

Сургалтыг Хэсэгчилсэн инженерийн хангамжийн удирдах газар ОНӨААТҮГ-ын Сайжруулсан шахмал түлшний хэлтэс удирдан явуулж, дүүргийн 7-24 дүгээр хорооны ажлын алба болон хэсгийн ахлагч нар хамрагдлаа.

Уг сургалтад дүүргийн Засаг дарга Н.Батсүмбэрэл цаг үеийн холбоотой мэдээлэл өгч, хороо тус бүр угаарын хийн эрсдэлээс сэргийлэх зөвлөмж мэдээ мэдээллийг иргэдэд шуурхай хүргэж ажиллах тал дээр анхаарч ажиллахыг үүрэг болголоо.

Иргэдтэй хамгийн ойр ажилладаг хороо, хэсгийн ахлагч нараар дамжуулан иргэдэд угаарын хийн эрсдэл үүсч байгаа шалтгаан нөхцөл, эрсдэлээс урьдчилан сэргийлэх, зөв галлагааны заавар зөвлөмж, мэдээллийг хүргэж байгаа юм.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хорооны ээлжит хурал өнөөдөр хуралдаж, гомдол гаргасан 3 иргэний асуудлыг хэлэлцэн, холбогдох шийдвэрийг гаргаж байна.

Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

Чингэлтэй дүүргийн удирдах ажилтны шуурхай хуралдаан өнөөдөр боллоо.  Шуурхай хуралдааныг Чингэлтэй дүүргийн Засаг даргын Тамгын газрын дарга Ж.Лхагвасүрэн удирдан явууллаа.

Өнөөдрийн хуралдаанд дүүргийн Хөдөлмөр халамж үйлчилгээний хэлтэс,  Нийгмийн даатгалын хэлтэс, Боловсролын хэлтсийн удирдлагууд мэдээлэл хийлээ.

Дүүргийн Засаг даргын Тамгын газрын дарга Ж.Лхагвасүрэн удирдах ажилтнуудад үүрэг даалгавар өглөө. Цаг агаар дулаарч буйтай холбоотой халиа тошин үүсэх, нэмэгдэх, шар усны үер болох эрсдэлтэй учраас дүүргийн гамшгаас хамгаалах алба, мэргэжлийн ангийн бэлтгэл, бэлэн байдлыг хангахыг даалгав.

Мөн иргэдийн аюулгүй байдлыг хангах орчин нөхцлийг бүрдүүлэх, хог цэвэрлэгээ, ариутгалын ажилд анхаарах, иргэдээс ирсэн өргөдөл гомдлын шийдвэрлэлийг цаг тухай бүрт нь шийдвэрлэх, иргэдийн санал хүсэлтийг сонсож ажиллахыг даалгалаа.

Хаврын дулаан улирал ирж буйтай холбоотой гудамж талбайд хүүхдүүд гадаа тоглох, дугуй, скүүтэр унах зэрэг хөдөлгөөний эрчим ихсэж байгаа учир хүүхдийг зам тээврийн ослоос урьдчилан сэргийлэх чиглэлээр ажиллахыг үүрэг болголоо.

Чингэлтэй дүүргийн оёдлын салбарын үйлдвэр эрхлэгчдийн дунд “Уран үйлчин-2024” уралдаан өнөөдөр эхэлж, уралдаанд оролцож буй жижиг, дунд бизнес эрхлэгчдэд “Оёмол бүтээгдэхүүний оёдолчны онолын мэдлэг олгох, бататгах” сургалтыг явууллаа.  

Оёдлын чанар стандартыг боловсронгуй болгох, мэдлэг чадварыг дээшлүүлэх, туршлагатай үйлдвэрлэгчдийн мэргэжлийн ур чадварыг сурталчлан таниулах, салбар дундын уялдаа холбоог сайжруулан үйлдвэрлэгчдийн хамтын ажиллагааг өргөжүүлэх зорилготой тус уралдааныг дүүргийн Засаг даргын Тамгын газар, Жижиг, дунд үйлдвэрийг дэмжих төв, “Оёдлын салбарын нэгдсэн мэргэжлийн холбоо” ТББ-тай хамтран  зохион байгуулж байна.

Уралдаанд оролцож буй оёдлын салбарын үйлдвэр эрхлэгчдийг бодлогоор дэмжиж ажиллаж, хамтын ажиллагаатай 4-5 улс руу жижиг, дунд бизнес эрхлэгчдийг туршлага судлуулах, бараа бүтээгдэхүүнээ борлуулах нөхцөл байдлаар хангаж ажиллахаа дүүргийн Засаг дарга Н.Батсүмбэрэл хэллээ.

Тус уралдаанд оёдлын салбарын 120 гаруй үйлдвэр эрхлэгчдэд оролцож ур чадвараа сорин өрсөлдөж байна. “Уран үйлчин-2024” уралдаан хоёр үе шаттай явагдана.

Онолын болон ур чадварын төрлөөр үндэсний хувцас, европ хувцас, хөдөлмөр хамгааллын хувцас гэсэн гурван төрлөөр зохион байгуулагдаж, болзол хангасан үйлдвэр эрхлэгчид “ОСНМХолбоо” ТББ-аас “Мастер оёдолчин” цол олгох юм.