“ШИЙТГЭЛ БОЛ ШИЙДЭЛ БИШ” АЯНЫ ХААЛТЫН ҮЙЛ АЖИЛЛАГААГ ЗОХИОН БАЙГУУЛЛАА

Жил бүрийн 4 дүгээр сарын 30-ны өдөр буюу “Хүүхдийг зодож, шийтгэхийн эсрэг Дэлхийн өдөр”-ийг угтан нийслэлийн Чингэлтэй дүүргээс “ШИЙТГЭЛ БОЛ ШИЙДЭЛ БИШ” аяныг 1 сарын хугацаанд олон талт арга хэмжээнүүдийг зохион байгууллаа.

Аяны хаалтын нэгдсэн өдөрлөгийг өнөөдөр Тусгаар тогтнолын талбайд зохион байгуулсан ба өдөрлөгт дүүргийн Иргэдийн Төлөөлөгчдийн Хурлын дарга Т.Уламбаяр, Засаг даргын орлогч З.Бямбажав, Засаг даргын зөвлөх Д.Уянга болон дүүргийн удирдлагууд, Ерөнхий боловсролын сургуулийн захирлууд оролцлоо.

“Шийтгэл бол шийдэл биш” аян хүүхдийн бие махбод, сэтгэл санааны эсрэг хүчирхийллийг таслан зогсоох, тэдний эрхийг хамгаалах, эцэг эх, асран хамгаалагчдад хүүхдийн хүмүүжлийн эерэг аргыг сурталчлан таниулах зорилготой.

“Шийтгэл бол шийдэл биш” аяны хүрээнд хүүхдийн дуу хоолойг сонсох, хүүхдийн эсрэг хүчирхийллийг таслан зогсоох, хүүхэд хүмүүжлийн эерэг аргын талаар гэр бүл, олон нийтийн зөв хандлагыг бий болгох чиглэлээр нэг сарын хугацаанд “Шийтгэл бол шийдэл биш” сэдэвт гар зураг, илтгэл, богино бичлэг, “Заах арга зүй, ур чадвар”-ын уралдаануудыг тус тус зохион байгуулж иргэдэд нөлөөллийн ажлыг хүргэсэн байна.