ДҮҮРГИЙН УДИРДАХ АЖИЛТНЫ ШУУРХАЙ ЗӨВЛӨГӨӨН БОЛЛОО

Дүүргийн удирдах ажилтны ээлжит шуурхай зөвлөгөөнийг Засаг дарга Н.Мандуул удирдан явууллаа.

Зөвлөгөөний хүрээнд Засаг даргын 2025 оны 1 дүгээр сарын 14-нээс 5 дугаар сарын 27-ны хооронд өгсөн нийт 140 үүрэг даалгаврын биелэлтийн талаар хэлэлцэв. Үүрэг даалгаврын хэрэгжилт одоогийн байдлаар 74.6 хувьтай байна.

Түүнчлэн Чингэлтэй дүүргийн Цагдаагийн газраас гэмт хэрэг, зөрчлөөс урьдчилан сэргийлэх, нийгмийн хэв журмыг хангах чиглэлээр 5 дугаар сарын байдлаарх нөхцөл байдлыг танилцууллаа.

Үүнд:

• Хүлээн авсан дуудлага, мэдээлэл өмнөх оны мөн үетэй харьцуулахад 5.6 хувиар буурсан;
• Гомдол, мэдээлэл 21.5 хувиар буурсан;
• Бүртгэгдсэн гэмт хэрэг 18.1 хувиар буурсан;
• Харин бүртгэгдсэн зөрчил 64.6 хувиар өссөн эерэг үзүүлэлттэй байна.

Мөн энэ сарын 27-нд болох “Чингэлтэй Хайрханыг тахих” тахилгын үйл ажиллагаа, мөн 28, 29-нд зохион байгуулагдах “Иргэдийн баяр - Хүрээ цам Даншиг” шашин, соёлын наадмын бэлтгэл ажлын талаар хэлэлцэж, үүрэг чиглэл өглөө.

Засаг дарга Н.Мандуул дараах үүрэг, чиглэлүүдийг өгөв. Үүнд:

1. Баярын бэлтгэл ажил:
   • Үндэсний их баяр наадмыг угтаж бүх байгууллагын гадна орчныг тохижуулах, өнгө үзэмжийг сайжруулах;
   • Цонх, хаалга угаах, гэрэлтүүлэг, ногоон байгууламж, зүлэг тарих, усалгаа, цэвэрлэгээ хийх;
   • Байгууллагын хаягжилтыг кирилл үсгээр, зөв бичиж шинэчлэх;
   • Засаг даргын уриалгыг хамтран ажилладаг бүх байгууллагуудад хүргэж ажиллах.
2. Өмч хөрөнгийн тооллого:
   • Дүүргийн хэмжээнд явагдаж буй тооллогод идэвхтэй оролцох.
3. Албан хэрэг хөтлөлт:
   • Монгол бичгээр баримт бичиг хослуулан хөтлөх ажлыг эрчимжүүлэх;
   • Улсын үзлэгт бэлтгэж, холбогдох стандарт, шаардлагыг мөрдөх.
4. Тахилга, баярын арга хэмжээ:
   • “Чингэлтэй Хайрханы тахилга”, “Иргэдийн баяр-Хүрээ цам Даншиг” арга хэмжээний бэлтгэл ажлыг бүрэн хангаж, зохион байгуулалтад онцгой анхаарах.
5. Төсвийн орлого:
   • Төсвийн орлогын төлөвлөгөөг биелүүлэх, орлого бүрдүүлэлтийг бүх шатанд эрчимжүүлэх.
6. Гамшгаас сэргийлэлт:
   • Ой, хээрийн түймэр болон үер усны аюулаас урьдчилан сэргийлэх ажлыг тогтмол зохион байгуулах.
7. Эрүүл мэндийн чиглэлээр:
   • Улаанбурханы өвчний тандалт, дархлаажуулалт, урьдчилан сэргийлэх арга хэмжээний бэлэн байдлыг хангах.
8. Хэв журам сахиулах:
   • Баярын өдрүүдийг угтан гэмт хэрэг, зөрчлөөс урьдчилан сэргийлэх ажлыг идэвхжүүлэн зохион байгуулах.
9. Зуны түр худалдаа:
   • Хороодын нутаг дэвсгэрт батлагдсан захирамжийн дагуу зөвшөөрөлтэй (зайрмаг 32, түргэн хоол 15) цэгээс бусдыг байрлуулахгүй байх;
   • Зөвшөөрөлгүй цэг байрлуулсан тохиолдолд яаралтай арга хэмжээ авч, нүүлгэн шилжүүлэх ажлыг хороод өөрсдөө гүйцэтгэх.