Ухаалаг системтэй теле камерын хяналтын дэд төвийг ашиглалтад орууллаа

Нийслэлийн хэмжээнд “Теле камерын нэгдсэн төв”-ийг байгуулахын зэрэгцээ есөн дүүрэгт салбар дэд төвүүдийг байгуулсан юм.

Үүний хүрээнд дүүргийн Теле камерын хяналтын дэд төвийг шинэчлэн байгуулж, албан ёсоор ашиглалтад орууллаа.

Тус дэд төв нь 11 ам.метрийн хэмжээтэй ханын дэлгэц, удирдлагын иж бүрэн төхөөрөмж, аудио болон видео хяналтын системээр тоноглогдсон бөгөөд нийт 340 ширхэг камерын ухаалаг програм хангамжтай.

Энэхүү төвийг 2.9 тэрбум төгрөгийн хөрөнгө оруулалтаар бүтээсэн юм. Уг ухаалаг систем нь ердийн камерын тусламжтайгаар хүний царай болон автомашины улсын дугаарыг таних, зөрчил илрүүлэх боломж бүрдэж байгаа нь хяналтын үр нөлөөг эрс нэмэгдүүлж байна.

Манай дүүрэг анх 2022 онд Теле камерын хяналтын төвөө байгуулсан бөгөөд 2022-2024 оны хооронд 22 хорооны нутаг дэвсгэрт MNS 6423:2019 стандартад нийцсэн, 4 мегапикселийн нягтралтай нийт 2538 хяналтын камерыг 638 байршилд суурилуулсан. 

Одоогоор Чингэлтэй дүүргийн камерын төв нь 2600 гаруй камерыг 30 хоногийн турш хадгалах хүчин чадалтай, 12 ширхэг сервер бүхий серверийн өрөөтэй.

Мөн 72 ам.метр талбай, 29 дэлгэц бүхий хяналтын өрөөнд нийт 2454 камерын лицензтэйгээр тасралтгүй хяналт-шинжилгээ, мэдээлэл боловсруулалтын ажиллагаа явуулж байна.