5 дугаар хорооны орон сууцны хорооллуудын зогсоолын хүртээмжийг сайжруулж, шинээр ил зогсоол барина

Дүүргийн 5 дугаар хорооны нутаг дэвсгэр, Тэнгис кино театрын баруун хойд талд байрлах орон сууцны хорооллууд нь социализмын үеийн төлөвлөлттэй учраас автомашины зогсоолын хүрэлцээ хангалтгүй байна.

Энэ асуудлын хүрээнд Нийслэлийн Ерөнхий архитектор Ч.Төгсдэлгэр, дүүргийн Засаг дарга Н.Мандуул болон холбогдох албаныхан газар дээр нь очиж ажиллалаа.

Нийслэлийн Ерөнхий архитектор Ч.Төгсдэлгэр “5 дугаар хороонд зогсоолын хүрэлцээ маш бага, хотын төвд байршилтай учраас автомашины ачаалал өндөр. Тиймээс “Зогсоол” хөтөлбөрийн хүрээнд нэн түрүүнд шаардлагатай зогсоол барих 40 байршлын нэгээр энэ хэсэг нэрлэгдэж байна” хэмээлээ.

Мөн энэхүү байршилд зарим хувийн хэвшлийн компаниуд нийтийн эзэмшлийн газарт хаалт хийж, төлбөртэй зогсоол болгон ашиглаж байгаа зөрчил их илэрсэн. Үүнтэй холбогдуулан албаныхан Нийслэлийн Хот байгуулалт, хөгжлийн газарт (НХШГ) хандан зөрчлүүдийг арилгуулах, мөн нийтийн эзэмшлийн талбайд ашиглагдаж буй зогсоолын орлогын 40 хувийг Авто замын санд төвлөрүүлэх гэрээний асуудлыг зохицуулахаар боллоо.

Иргэдийн тав тухтай, аюулгүй орчинд амьдрах нөхцөлийг бүрдүүлэх зорилгоор авто зогсоолын хүртээмжийг нэмэгдүүлэх бодлогын хүрээнд шат дараатай арга хэмжээ авч ажилласаар байна.