НӨӨЦИЙН МАХ ХУДАЛДАН БОРЛУУЛАХ ХҮНСНИЙ ДЭЛГҮҮРҮҮДЭД СУРГАЛТ ЗОХИОН БАЙГУУЛЛАА

Улаанбаатар хотын Захирагчийн ажлын алба нь махны хомсдолыг багасгах, үнийн хөөргөдлийг тогтворжуулах зорилгоор нөөцийн махыг 01-р сарын 20 буюу ирэх 7 хоногийн мягмар гарагаас эхлэн 06-р сарын 10-ны өдөр хүртэл хугацаанд нийслэлийн хүн амын хүнсний хэрэгцээнд зориулан худалдан борлуулахаар болсон.

Ингэхдээ 1 кг үхрийн махыг 15,000 төгрөг, 1кг хонины махыг 13,000 төгрөгөөр зах зээлд нийлүүлэх бөгөөд Баянгол дүүргийн хэмжээнд дүүргийн 20 хорооны 38 дэлгүүрт буюу Дүүргийн 13, 15, 16, 17, 18, 19, 20, 21, 22, 23, 24-р хороонд “Мах Импекс” ХХК, Дүүргийн 1, 2, 4, 5, 6, 7, 8, 9, 10, 11, 12-р хороонд “АГРО НЭГТГЭЛ ТРЭЙД” ХХК-ийн бэлтгэсэн нөөцийн махыг борлуулна.

Энэ хүрээнд өнөөдөр дүүргийн Хүнс, худалдаа үйлчилгээний хэлтсээс Нийслэлийн Хүнс, хөдөө аж ахуйн газар, Нийслэлийн Эрүүл мэндийн газартай хамтран нөөцийн мах худалдан борлуулах аж ахуй нэгжүүдэд зориулсан сургалт зохион байгууллаа.

Сургалтыг дүүргийн Хүнс, худалдаа үйлчилгээний хэлтсийн дарга Б.Номин нээсэн бөгөөд дүүргийн нутаг дэвсгэрт нөөцийн махны худалдан борлуулалтын талаар, Нийслэлийн Хүнс, хөдөө аж ахуйн газраас нөөцийн маханд тавигдах шаардлага, нийслэлийн эрүүл мэндийн газраас эрүүл ахуйн талаар тус тус мэдээлэл өглөө.

Түүнчлэн энэ жил нөөцийн мах борлуулах дэлгүүрүүдэд санхүүгийн хувьд өр үүсгэхгүйгээр төлбөр тооцоог хугацаанд нь хийх чадвартай байх, татварын ерөнхий системд хэрэглэгчийн систем нийлүүлэгч зөвшөөрөл бүхий ААН-ээр программ суулгуулсан, и-баримт олгодог байх, пос машины НӨАТ-аас чөлөөлөх тохиргоог суурилуулсан байх, цагдаагийн байгууллагаар хянуулсан хяналтын камертай, камерын бичлэг нь 30 хоног хадгалах хүчин чадалтай байх зэрэг 9 шалгуур үзүүлэлтийг тавьж байгаа юм.