Угаарын хийд хордсон тухай дуудлага 06:00-14:00, 22:00-00:00 цагуудад хамгийн их бүртгэгдэж байна

Хүйтний эрч чангарч эхлэхтэй холбоотойгоор угаарын хийд хордсон дуудлага мэдээлэл ихсэх хандлагатай байгааг Цагдаагийн байгууллагаас анхаарууллаа. Мөн угаарын хийд хордсон тухай дуудлага 06:00-14:00, 22:00-00:00 цагуудад хамгийн их бүртгэгдэж байгаа тул та бүхэн угаарын хийн хордлогоос урьдчилан сэргийлж дараах зөвлөмжийг дагаарай.

Угаарын эрсдлээс урьдчилан сэргийлэх зөвлөмж:

-Галлагаа хийх үедээ зуух, яндангийн шүүлтүүрийн бүрэн ажиллагааг шалгах

-Зуухны аюулгүй байдал, угаарийн хий мэдрэгчийн хэвийн ажиллагааг шалгах

-Зуухыг битүү дүүртэл шахмал түлш хийхгүй байх

-Яндангаа хөөлөх, гэр, байшиндаа агаар сэлгэлтийг тогтмол хийх

-Нүүрс шатаж дуусаагүй илчтэй, халуун байхад дахин нүүрс нэмж хийхгүй байж болзошгүй эрсдэлээс урьдчилан сэргийлэхийг зөвлөж байна. 

Угаарын хий гэдэг нь зуухан дотор агаарын эргэлт муутай, хүчилтөрөгч хангалттай биш үед СО2-ын оронд үүсдэг СО. Энэ бол угаарын хий буюу өнгөгүй, үнэргүй, үхлийн аюултай хорт хийг хэлдэг. Угаарталтаас сэргийлж нийт 500 гаруй ажилтан улирлын чанартай ажиллаж байна. Тодруулбал, есдүгээр сарын сүүлээр ажилдаа ороод гурван сар хүртэл ажилладаг. Айлуудад тавьсан угаар мэдрэгч аюулд орлоо гэдэг дохиог өгсөн тохиолдолд тухайн айл руу ажилтан залгах юм. Утсаа авахгүй байгаа тохиолдолд дүүрэг, хороод дээр байршсан 500 гаруй ажилтнаас хамгийн ойр байршиж байгаа нь хаягийнх нь дагуу биеэрээ очиж шалган ажиллаж байна.

УГААРЫН ХИЙН ХОРДЛОГООС УРЬДЧИЛАН СЭРГИЙЛЬЕ.