УДИРДАХ АЖИЛТНЫ ЭЭЛЖИТ ШУУРХАЙ ЗӨВЛӨГӨӨН БОЛЛОО

Чингэлтэй дүүргийн Удирдах ажилтны ээлжит шуурхай зөвлөгөөн өнөөдөр боллоо. Зөвлөгөөний эхэнд Засаг дарга Н.Мандуул дүүргийн дараагийн шуурхай дээр хэлэлцэх асуудлуудыг танилцууллаа.

Дараагийн шуурхай зөвлөгөөн дээр Эрх шилжүүлсэн ажлуудын үнэлгээний хороог шуурхай байгуулж, худалдан авах ажиллагааг эрчимжүүлж, тендер шалгаруулалтад амжилтгүй болсон төсөл, арга хэмжээг танилцуулахыг Төлөвлөлт, гүйцэтгэлийн удирдлагын хэлтэст,  Томуу, томуу төст өвчний дэгдэлттэй холбогдуулан бага насны хүүхдүүдийн дархлаажуулалтын явц болон өвчлөлөөс урьдчилан сэргийлэх ажлууд зохион байгуулж буй талаар дүүргийн Эрүүл мэндийн төвд,  дүүргийн нутаг дэвсгэрийн хэмжээнд зам тээврийн осол ихээр гардаг байршлуудын судалгаа, эдгээр байршлуудад зөв зохистой өөрчлөлт хийх боломжуудыг судалж танилцуулахыг Замын цагдаагийн газарт үүрэг болголоо.

Энэ удаагийн шуурхай зөвлөгөөнөөр дараах үүрэг даалгаврыг өглөө.

Гал түймрийн осол аваар, угаарын хийнээс урьдчилан сэргийлэх зөвлөгөө мэдээллийг хороодын Засаг даргын ажлын албатай хамтран ажиллаж,  зорилтот айл өрх, иргэдийн аюулгүй байдлыг хангаж ажиллах,

Дүүргийн нутаг дэвсгэр дэх хог хаягдлыг тухай бүр цэвэрлэх, шөнийн цагт шуурхай тээвэрлэх, золбин нохой, муур устгах зэрэг хот нийтийн аж ахуйн ажлуудаа эрчимжүүлэх,

Хөрөнгө оруулалт, бүтээн байгуулалтын ажлын хүрээнд 2025 оны 03 дугаар сараас барилга угсралтын ажлуудыг эхлүүлэх ажил дээр анхаарч ажиллах,

Сар шинийн баярын өдрүүдэд ажиллах хариуцлагатай жижүүрүүдийг томилж, холбогдох байгууллагуудтай уялдаа холбоотой хамтран ажиллаж, утасны бэлэн байдлыг хангах талаар анхаарах,

Сэлбэ дэд төвийн түшиглэн гэр хорооллыг орон сууцжуулах ажлын талбайг бэлтгэх, чөлөөлөгдсөн нэгж талбарын цэвэрлэгээ, хог тээвэрлэлтийн дуусгаж, хашаалах ажлыг зохион байгуулах,

БНСУ-ын Ёндун-Гүн сумтай хамтран ажиллах санамж бичгийн хүрээнд улирлын чанартай ажлын байранд ажиллах хүч солилцох, ажилчин солилцох ажил руу анхаарч, дүүргийн иргэдийг бэлтгэх,

НҮБ-ын Хөгжлийн хөтөлбөртэй хамтран ажиллах санамж бичгийн хүрээнд Гэр хорооллын айл өрхүүдэд нарны эрчим хүчинд түшиглэсэн халаалтын системийг нэвтрүүлэх ажлын зохион байгуулалт дээр анхаарч ажиллахыг хэлтэс албадын дарга нарт үүрэг болголоо.