ТӨСЛИЙН БАГИЙН ХАМТАРСАН УУЛЗАЛТ БОЛЛОО

“Чингэлтэй дүүргийн хөгжлийн бэрхшээлтэй хүүхдийн эрүүл мэнд, боловсрол, нийгмийн хамгааллын салбар” комиссын бүрэлдэхүүн, “Японы хүүхдийг ивээх сан”, төслийг хэрэгжүүлэгч “Энэрэнгүй-Үйлс” ӨЭМТ, 18 дугаар цэцэрлэгийн төлөөллүүдийн хамтарсан уулзалт өнөөдөр боллоо.

Хүүхдийг Ивээх Сан Япон Улсын Гадаад хэргийн яамны санхүүжилтээр “Тэгш хүртээмжтэй, цогц үйлчилгээгээр бага насны хүүхдийн хөгжлийг дэмжих нь” төслийг өнгөрсөн онд Чингэлтэй дүүрэгт хэрэгжүүлж эхэлсэн. Дүүргийн 4, 5 дугаар хорооны “Энэрэнгүй-Үйлс” ӨЭМТ, сургуулийн өмнөх боловсролын 18 дугаар цэцэрлэгийг хамруулан хөгжлийн бэрхшээлтэй хүүхдийн эрт илрүүлэг, оролцоо хөгжлийн дэмжлэгийг цогц байдлаар хэрэгжүүлэх асуудалд анхаарал хандуулан ажиллаж байна.

Тэгвэл энэ удаад “Хүүхэд бүрийг боловсролд тэгш хамруулах зарчмыг дэмжих нь” төсөл нь сургуулийн өмнөх бага насны хүүхдүүдэд чиглэсэн бөгөөд, тухайн насны хүүхдүүдийн хөгжлийн бэрхшээлийн эрт үеийн илрүүлэг, эрт оролцоог хангахын тулд эрүүл мэндийн төвүүд ба цэцэрлэгийн барилга байгууламжийн орчин болон хүний нөөцийн чадавхыг сайжруулах юм.

Уулзалтын хүрээнд нярай хүүхдийн эрүүл мэндийн үзлэг, эх, хүүхдийн эрүүл мэндийн дэвтэр, кейс хэлэлцүүлэг зэрэг Япон улсын хэрэгжүүлсэн төслийн санаачилгад тулгуурлан хүүхдийн хөгжлийн хоцрогдол, хөгжлийн бэрхшээлийг эрт илрүүлэх, шаардлагатай дэмжлэг, үйлчилгээг тасралтгүй үзүүлэх, салбар дундын зохицуулалтыг хангах асуудлыг хэлэлцэв.