УДИРДАХ АЖИЛТНЫ ЭЭЛЖИТ ШУУРХАЙ ЗӨВЛӨГӨӨН БОЛЛОО

Дүүргийн удирдах ажилтны ээлжит шуурхай зөвлөгөөн өнөөдөр болж дүүргийн Засаг дарга Н.Мандуул удирдан явууллаа. Зөвлөгөөний эхэнд өмнөх хуралдаанаар өгсөн үүрэг даалгаврын биелэлтийг танилцууллаа.

Энэ удаагийн зөвлөгөөнөөр Эрүүл мэндийн төв, Цагдаагийн газраас хийж хэрэгжүүлж буй зарим арга хэмжээний талаарх мэдээ мэдээлэл, нөхцөл байдал, авч хэрэгжүүлсэн ажлын талаар мэдээлэл хийлээ.

Урин дулааны улирал эхэлж байгаатай холбогдуулан шар усны үерийн аюулаас урьдчилан сэргийлэх, үерийн эрсдэл бүхий газар зөвшөөрөлгүй суурьшсан айл өрхүүдийг нүүлгэн шилжүүлэх ажлыг зохион байгуулах, Сэлбэ дэд төвийн чөлөөлөгдсөн нэгж талбарын цэвэрлэгээ, хог тээвэрлэлтийг дуусгаж, хашаалах ажлыг яаралтай зохион байгуулах, ирэх өвлөөс эхлэн стандарт нийцсэн тусгай зориулалтын бодис давсыг авах ажилд анхаарах, энэ жилийн үлдсэн давс бодисыг сайтар нөөцөлж хадгалахыг үүрэг болголоо.

Мөн дүүргийн ИТХ-аас санаачлан зохион байгуулж буй 7 хоног бүрийн "Даваа" гарагийг "Үндэсний хувцас өмсөх өдөр" болгон баталсантай холбогдуулан бүх хэлтэс, албад дэмжиж ажиллах,  дүүргийн хэмжээнд гэмт хэрэг зөрчлөөс урьдчилан сэргийлэх ажлыг зохион байгуулах, Турк Улсын хамтын ажиллагааны зохицуулах агентлагтай хамтран Анкара гудамжийг сэргээн тохижуулах, ногоон байгууламжийг нэмэгдүүлэх цэгцлэх ажлын төлөвлөгөөг гаргах ажил дээр анхаарч ажиллахыг Засаг дарга нийт удирдлагуудад үүрэг болголоо.