“ОРОН СУУЦНЫ БОЛОН ОРОН СУУЦНЫ БУС ЗОРИУЛАЛТТАЙ БАЙШИНГИЙН ДУНДЫН ӨМЧЛӨЛИЙН ЭД ХӨРӨНГИЙН МЕНЕЖМЕНТИЙН ТУХАЙ” ХУУЛИЙН ТӨСЛИЙГ ТАНИЛЦУУЛЖ, ХЭЛЭЛЦҮҮЛЛЭЭ

УИХ-ын гишүүн О.Номинчимэг, дүүргийн Засаг дарга Н.Мандуул нар “Орон сууцны болон орон сууцны бус зориулалттай байшингийн дундын өмчлөлийн эд хөрөнгийн менежментийн тухай” хуулийн (шинэчилсэн найруулга) төслийг дүүргийн иргэдэд танилцууллаа.

Улсын хэмжээнд сууц өмчлөгчдийн 1839 холбоо байна. Үүнээс нийслэлд 1648, орон нутагт 191, Чингэлтэй дүүргийн хэмжээнд 116 сууц өмчлөгчдийн холбоо үйл ажиллагаа явуулдаг.  Хуулийн төсөл дээр СӨХ-ны мөн чанар, үйл ажиллагааны бүтэц, санхүүгийн тайлагналын ил тод байдал, шинэ тутам гарч буй харилцаа, гэрээт менежмент нэвтрүүлэх, СӨХ мэргэжлийн байх, СӨХ-ны нэгдэл өөрийн мэргэжлийн удирдлагатай байх зэрэг асуудлуудыг тусгажээ.

Мөн өмчлөгчийн үүрэг хариуцлагыг нэмэгдүүлэх, иргэд өөрсдийн хамтын амьдралын дүрмээ зохиож байгаа учир өмчийн эзэн хариуцлагатай байх, төлбөр төлөхтэй холбоотой харилцаа, алданги тооцох, зээлийн мэдээллийн сантай уялдуулах, хуримтлалын сантай болох, оршин суугчдын дүрмээ даган хэрэгжүүлдэг байх харилцааг багтаасан байна.

Хуулийн төслийн танилцуулга, хэлэлцүүлэгт орон сууцны байшин болон орон сууцны бус зориулалттай оффисын барилга, байгууламж, дундын өмчлөлийн инженерийн дэд бүтэцтэй гэр хороолол, амины орон сууц, хотхоны эзэмшигч, өмчлөгч 159 иргэн оролцлоо.