“Нарны илч” төслийн ногоон өрхийн бодит үр дүнтэй танилцлаа

Засаг дарга Н.Мандуул, менежер Д.Уянга нар дүүргийн ногоон өрхийн нэг, 13-р хорооны иргэн Ц.Даваажавынд зочилж, сар шинийн мэндчилгээ дэвшүүлэн, сэргээгдэх эрчим хүчний хэрэглээний бодит үр дүнтэй танилцлаа.

Хаврын тэргүүн сар эхэлж, дулааны улирал наашилж буй ч шөнөдөө -25 хэмийн хүйтэн хонож байна. Ийм жавартай шөнө Ц.Даваажавынх +25 хэмийн дулаан, тохилог орчинд амар тайван амьдарч буй. Тус өрх нь дүүрэгт хэрэгжиж байгаа “Нарны илч” төслийн хүрээнд нарны хавтан суурилуулж, сэргээгдэх эрчим хүчээр дулаанаа шийдсэн 93 өрхийн нэг юм. Төсөлд хамрагдсанаас хойш яг 1 сарын хугацаанд нийт дулааныхаа 53 хувийг сэргээгдэх эрчим хүчээр хангасан чамлахааргүй үр дүн гарчээ.

Өмнө нь цахилгаан халаагуур ашиглан дулаанаа шийддэг байсан бөгөөд цахилгааны төлбөрт сард дунджаар 300-500 мянган төгрөг зарцуулдаг байв. Харин нарны хавтан суурилуулснаар цахилгааны зардал гурав дахин буурч, өрхийн төсөвт бодит хэмнэлт бий болжээ.

Ц.Даваажавынх өдөр бүр 10:00-18:00 цагийн хооронд нарны хавтангаас дулаанаа авч, оройн 21:00 цагаас хойш цахилгааны хөнгөлөлттэй тарифт хамрагддаг. Мөн илүүдэл үйлдвэрлэсэн эрчим хүчээ төвийн сүлжээнд нийлүүлж байгаа нь сэргээгдэх эрчим хүчийг үр ашигтай ашиглаж буй сайн жишээ болж байна.