Монгол Улсын Ерөнхийлөгч Ухнаагийн Хүрэлсүх Чингэлтэй дүүргийн иргэдтэй уулзав.

Монгол Улсын Ерөнхийлөгч Ухнаагийн Хүрэлсүх Чингэлтэй дүүргийн иргэдтэй уулзаж, төрөөс хэрэгжүүлж буй бодлого, үйл ажиллагаа, санаачилсан “Хүнсний хувьсгал”, “Цагаан алт”, “Тэрбум мод”, “Эрүүл монгол хүн”, “Илгээлт-2100” зэрэг үндэсний хөдөлгөөн, хөтөлбөрүүд, мөн гадаад харилцаа, нийгэм, эдийн засгийн нөхцөл байдлын талаар дэлгэрэнгүй мэдээлэл өглөө.

Уулзалтын үеэр дүүргийн Засаг дарга Н.Мандуул дүүргийн хэмжээнд хэрэгжүүлж буй ажлуудаас танилцуулж, өнгөрсөн онд 93 өрхийг сэргээгдэх эрчим хүчинд холбосон бөгөөд цаашид 500 гаруй өрхийг хамруулахаар төлөвлөж байгааг онцоллоо.

Мөн “Тэрбум мод” үндэсний хөдөлгөөний хүрээнд дүүргийн хэмжээнд 150 гаруй мянган мод тарьж ургуулснаас гэр хороололд 10 мянга гаруй мод тарьсан нь бодит үр дүн болж байгааг дурдлаа.

Түүнчлэн “Ерөнхийлөгчийн илгээлт-2100” тэтгэлэгт хөтөлбөрийн хүрээнд 21 улсад 1055 оюутан суралцаж байгаагаас 40 гаруй нь Чингэлтэй дүүргийн хүүхдүүд байгааг онцлон тэмдэглэв.

Ерөнхийлөгч уулзалтын үеэр үр хүүхдээ эрдэм боловсролтой, зөв хүмүүжилтэй болгон өсгөж буй эцэг эхчүүд, тэднийг дэмжин ажиллаж буй багш нарт талархал илэрхийлж, цаашид төр, засаг, иргэд хамтдаа эв нэгдэлтэй байж, зөвийг дэмжин, ёсыг сахиж, улс орныхоо хөгжил дэвшлийн төлөө хамтран зүтгэхийг уриаллаа.