Монгол Улсын Их Хурлын 2024 оны 01 дүгээр сарын 17-ны өдрийн нэгдсэн хуралдаанаар баталсан Хүүхэд хамгааллын тухай хуулийн шинэчилсэн найруулга, нэмэлт өөрчлөлт ирэх 09 дүгээр сарын 01-ний өдрөөс хэрэгжиж эхлэх юм. Үүнтэй холбогдуулан Чингэлтэй дүүргийн төрийн албан хаагчид болон хүүхэд, гэр бүлийн өмнө үүрэг хүлээгчдэд хуулийг таниулах зорилгоор Засгийн газрын хэрэгжүүлэгч агентлаг Хүүхэд, гэр бүлийн хөгжил, хамгааллын ерөнхий газар, Чингэлтэй дүүргийн Засаг даргын Тамгын газартай хамтран хууль сурталчлах арга хэмжээг зохион байгууллаа.

Тус арга хэмжээнд УИХ-ын гишүүн М.Оюунчимэг, Хүүхдийн эрхийн хэрэгжилтийн газрын дарга Г.Мөнхнасан, Чингэлтэй дүүргийн Засаг даргын орлогч З.Бямбажав болон бусад албаны нийт 200 гаруй албан хаагчид оролцлоо.

Хуулийн шинэчилсэн найруулгаар хуулийн үйлчлэх хүрээг илүү өргөжүүлж, хүүхэд хамгаалалд оролцогч талуудын үүрэг хариуцлагыг тодорхой болгосноос гадна сум хороодод Хүүхэд, гэр бүлийн нийгмийн ажилтан хэмээх орон тоог нэмэгдүүлж ажиллахаар хуульчлаад байгаа юм.

Хөдөлмөр нийгмийн хамгааллын яам, Азийн хөгжлийн банк, Монголын улаан загалмайн нийгэмлэг хамтран “Цар тахлын үед хариу арга хэмжээ авах нийгмийн хамгааллын төсөл 2”-ын хүрээнд хэрэгжүүлж буй “Төгсөлтийн аргачлалын туршилтын хөтөлбөр”-ийн явцын хяналтын уулзалт зохион байгуулагдлаа.

Өнөөдрийн уулзалтад дүүргийн Засаг даргын Тамгын газрын дарга Ж.Лхагвасүрэн, Хөдөлмөр, Нийгмийн хамгааллын яамны Шинжээч Д.Гэрэлтуяа, Азийн хөгжлийн банкны Монгол дахь Төлөөлөгчийн газраас Л.Итгэл, Азийн хөгжлийн банкны төв салбарын Олон улсын зөвлөх Палак Равал, Төсөл хэрэгжүүлэгч нэгжээс Хөтөлбөрийн зохицуулагч Б.Болормаа, Монголын Улаан загалмай нийгэмлэгийн төлөөлөл, төслийг хэрэгжүүлэгч Ажлын хэсгийн бүрэлдэхүүн оролцлоо.

Чингэлтэй дүүргээс уг хөтөлбөрт 207 өрх хамрагдаж байгаа бөгөөд өрх бүрийн сонгосон бизнест тохируулан тус бүр 1.5 сая төгрөгийн үнэ бүхий тоног төхөөрөмж, багаж хэрэгслийн дэмжлэг олгосон юм.

Үүнээс 205 өрх бизнесээ сонгон тоног төхөөрөмжөө авч, 2 өрх нь бизнесээ сонгоогүй ч төсөлдөө идэвхтэй хамрагдаж өрхийн бизнесээ эхлүүлж, төслийн үр шимээ хүртээд байна.

Туршилтын хөтөлбөрийн хэрэгжилтийн явцын талаар дүүргийн Хөдөлмөр, халамжийн үйлчилгээний хэлтэс төсөл хэрэгжүүлэгч нэгжид танилцуулж, дүүргийн ажлын хэсгийн гишүүд туршилтын хөтөлбөрт хамрагдаж буй зорилтот өрхүүдийг шаардлагатай нийгмийн үйлчилгээнд хамруулах, өрхийн үйлдвэрлэл, бичил бизнес, нийгмийн оролцоог дэмжих талаар авч хэрэгжүүлсэн арга хэмжээ, тулгамдаж буй асуудал болон цаашид төлөвлөж байгаа ажлын талаар мэдээлэл өгч, санал солилцлоо.

Азийн хөгжлийн банкны төв салбарын Олон улсын зөвлөх Палак Равал, туршилтын хөтөлбөрийн хугацаанд болон цаашид хэрэгжилтийн болон бодлогын түвшинд хариуцсан байгууллага бүр өөрсдийн чиг үүргийн хүрээнд үйл ажиллагаагаа хэрхэн уялдуулах, өрхөд тулгамдаж байгаа асуудлыг хэрхэн шийдвэрлэх талаарх санал, арга хэмжээг тусгасан төлөвлөгөө гаргаж ажиллах чиглэлийг ажлын хэсгийн гишүүдэд өглөө.

Иргэдийн аюулгүй, ая тухтай амьдрах орчныг бүрдүүлэх, гэмт хэрэг зөрчлөөс урьдчилан сэргийлэх, гэмт хэргийн гаралтыг бууруулах Чингэлтэй дүүргийн Нийтлэг үйлчилгээний газар камерын нэгдсэн төвийг байгуулж байсан. Анх тус камерын хяналтын төвд дүүргийн 1-3 дугаар хороог бүрэн камерын хяналтад оруулж байсан бол одоо дүүргийн 21 хороо бүрэн камержсан байна.

Уг төвийн үйл ажиллагааг нийслэл хотод жишиг болгон, үйл ажиллагаа болон гэмт хэрэг зөрчлийг хэрхэн илрүүлж байгаа сайн жишиг ажилтай өнөөдөр Цагдаагийн газрын удирдлагуудад танилцлаа.

Цагдаагийн ерөнхий газрын дарга, дотоодын цэргийн командлагч, генерал Т.Сүхболд болон дүүргийн Цагдаагийн газрын удирдлагуудад Засаг дарга Н.Батсүмбэрэл “Камерын хяналтын нэгдсэн төв”-ийн үйл ажиллагааг танилцууллаа.

Тус бүсийг байгуулахад дүүргийн 1 дүгээр хороог ногоон бүс болгон 61 цэгт 145 чиглэлийн камерын суурилж, ингэснээр гэмт хэрэг зөрчлийн дуудлага мэдээлэл өмнөх үеэс 48.6 хувиар буурч байсан. Одоо “Ногоон бүс” төслийн хамрах хүрээг нэмэгдүүлэн дүүргийн 21 хороог бүрэн камержуулж бүрэн ашиглалтад оруулжээ.

Мөн төслийн хүрээнд телехяналтын нэгдсэн төвөөс гадна дүүргийн цагдаагийн газрын дарга, хороодын хэсгийн байцаагч нар ажлын өрөөнөөс өөрийн хариуцсан нутаг дэвсгэрийн камерыг бүрэн хянаж үйл ажиллагаандаа ашиглах боломжтой юм.

“Камерын нэгдсэн төв, “Ногоон бүс”-ийг байгуулснаар зөвхөн гэмт хэрэг, зөрчил, болзошгүй эрсдэлээс урьдчилан сэргийлж, хамгаалаад зогсохгүй иргэдийг эрүүл, цэвэр орчинд амьдрах, амьдралын зөв дадал хэвшилтэй байхад туслах олон талын ач холбогдолтой” хэмээн Засаг дарга Н.Батсүмбэрэл онцоллоо.

Чингэлтэй дүүргийн хугацаат цэргийн албаны 2024 оны нэгдүгээр ээлжийн цэрэг татлага ерөнхий боловсролын V сургууль дээр өнөөдөр эхэллээ.

Цэргийн насны залуус, тэдний ар гэр, эцэг эхийн төлөөлөлд Монгол Улсын батлан хамгаалах үйл ажиллагааг сурталчлах, эх орноороо бахархах үзлийг нэмэгдүүлэх зорилгоор зохион байгуулсан цэрэг татлагын нээлтийн ажиллагаа боллоо.

Нээлтийн ажиллагаанд дүүргийн Иргэдийн Төлөөлөгчдийн Хурлын дарга Б.Мөнхбат, Засаг дарга Н.Батсүмбэрэл болон дүүргийн цэрэг татлагын товчооны бие бүрэлдэхүүн, цэргийн албанд татагдах зарлан муудах мэдэгдэл хуудас авсан залуус, тэдний ар гэр иргэд оролцлоо.

Нээлтийн ажиллагаанд Цэргийн дуу бүжгийн эрдмийн чуулгын уран бүтээлчид, “Тусгай салаа” киноны жүжигчин Б.Эрдэнэбаяр, Fire хамтлага, Увертюра хамтлагийн уран бүтээлчид оролцож ая дуугаа өргөлөө.

Хугацаат цэргийн албанд татагдах залуус:

- Иргэний үнэмлэх,

- Цэргийн үүрэгтний үнэмлэх,

- Мэргэжил эзэмшсэн бол мэргэжлийн үнэмлэх,

- Сургууль төгссөн бол диплом, Цээж зураг зэргийг биедээ авч,

- Цэрэг татлагын байранд тогтоосон хугацаанд ирэх үүрэгтэй юм.

ЦЭРГИЙН НАСНЫ НИЙТ ЗАЛУУС ЦЭРЭГ ТАТЛАГАД ИДЭВХТЭЙ ХАМРАГДАНА УУ.

Чингэлтэй дүүргийн 17 дугаар хорооны цогцолбор байрны шав тавих арга хэмжээ боллоо. Арга хэмжээнд Чингэлтэй дүүргийн Засаг дарга Н.Батсүмбэрэл, дүүргийн Засаг даргын  зөвлөх Л.Цэеэрэгзэн, дүүргийн 17 дугаар хорооны Засаг дарга В.Хүрэлбаатар, ДИТХ-ын төлөөлөгч Х.Алтаншагай нар болон албаны төлөөлөл, иргэд оролцлоо.

Иргэдэд үзүүлэх төрийн үйлчилгээг хүртээмжтэй, хороодын ачааллыг тэнцвэржүүлэх үүднээс тус хорооны цогцолбор байрны шавыг өнөөдөр тавилаа.  Хорооны цогцолбор байр ашиглалтад орсноор 8722 гаруй иргэн хороо, цагдаагийн хэсэг, өрхийн эмнэлэг зэрэг төрийн үйлчилгээг тав тухтай нэг цэгээс чирэгдэлгүй хүлээн авах нөхцөл боломж бүрдэж байгаа юм.

Дүүргийн 17 дугаар хорооны сурагчийн 24 дүгээр гудамжны 2 нэгж талбарын 1100 мкв талбайг чөлөөлсөн бөгөөд барилгын ажлыг ирэх долоо хоногт эхэлж, энэ оны  09 дүгээр сарын 15-ны өдөр хүлээлгэж өгөх юм. Гүйцэтгэгч компаниар  “Рокгранд” ХХК ажиллаж байна.

Чингэлтэй дүүргийн Ахмадын аварга шалгаруулах “ГРАУНД ГОЛЬФ”-ын тэмцээн 05 дугаар сарын 01-ний өдөр” ХАЙРХАН ХӨГЖИЛ 1” төвийн хөл бөмбөгийн талбайд амжилттай зохион байгуулагдлаа.

Тэмцээний нээлтийн үйл ажиллагаанд  Биеийн тамир, спортын хорооны дарга Б. Мөнхбаяр, дүүргийн Ахмадын хорооны  дарга Ч.Төвсанаа нар оролцож тамирчдад амжилт хүссэн юм.

Тус тэмцээнд 17 багийн 102  тамирчин оролцож аваргын төлөө өрсөлдсөнөөс:

1-байр Т.Батзул  ахлагчтай 21-р хорооны баг

 2-байр Д.Чимэдцэрэн  ахлагчтай 5-р хорооны баг

 3-байр Д.Отгонбаяр ахлагчтай 17-р хорооны баг тус тус байр эзэлж

медаль өргөмжлөл мөнгөн шагналаар шагнагдлаа.

Чингэлтэй дүүргийн Засаг дарга Н.Батсүмбэрэл Бэтүб хийдийн лам хуврагтай уулзан санал хүсэлт, үйл ажиллагаатай нь биечлэн танилцлаа. Тус хийдийн дэргэд шашны сургуультай бөгөөд ерөнхий боловсролын зургаадугаар анги төгссөн, бурхны номыг хичээнгүйлэн судлах хүүхдүүдийг авч суралцуулдаг.

Бэтүб хийдийг Энэтхэг улсын улс төр, шашны нэрт зүтгэлтэн, дипломатч бөгөөд Бурхан багшийн арван зургаан Найдан архдын нэг Бакулагийн 20 дахь хойд дүр Бакула Ринбүүчи 1999 онд үүсгэн байгуулжээ.

Чингэлтэй дүүргийн удирдах ажилтны ээлжит шуурхай хуралдаан өнөөдөр боллоо. Хуралдааныг Чингэлтэй дүүргийн Засаг даргын Тамгын газрын дарга Ж.Лхагвасүрэн удирдан явууллаа.

Өнгөрсөн зөвлөгөөнөөр өгсөн үүрэг даалгаврын биелэлтийн талаар дүүргийн Архивын хэлтсийн дарга Д.Батчимэг, дүүргийн Худалдан авах ажиллагааны албаны М.Навчаа, Газар зохион байгуулалтын албаны дарга Х.Хишигбадрах, дүүргийн Хоймор хайрхан амралт ОНӨТҮГ-ын дарга Б.Насанбат нар мэдээлэл өглөө. Мөн дүүргийн Прокурорын газраас мэдээлэл хийлээ.

Дүүргийн Засаг даргын Тамгын газрын дарга Ж.Лхагвасүрэн удирдах ажилтнуудад үүрэг даалгавар өглөө.

Дүүргийн хүн амыг хөдөлгөөний дутагдлаас урьдчилан сэргийлэх, иргэн, гэр бүл, байгууллага, хамт олныг эрүүл амьдрах хэв маягт төлөвшүүлэх, бүх нийтийн биеийн тамир, спортыг хөгжүүлэхэд  олон нийтийн оролцоог дэмжих зорилгоор жил бүр уламжлал болгон зохион байгуулагддаг “Эртэч Чингэлтэйчүүд III” аянд оролцоог хангаж ажиллах             

Бүх нийтийн мод тарих өдөрлөгөөр хэлтэс албад модны нөхөн сэргээлт хийх ажлыг зохион байгуулж, оролцоог сайжруулах

Дэргэдэх хэлтэс, албадууд цаг үеийн холбогдолтой зохион байгуулагдаж буй ажил, арга хэмжээг зохион байгуулахад анхаарах

Энэ оны нэгдүгээр ээлжийн цэрэг татлагын зохион байгуулалт, үйл ажиллагааны бэлтгэл ажлыг сайтар хангаж ажиллах

Албан хэрэг хөтлөлт, өргөдөл гомдлын шийдвэрлэлтэд анхаарч ажиллахыг үүрэг болголоо.

Хөдөлмөрийн аюулгүй байдал, эрүүл ахуйн сарын аяны хүрээнд Чингэлтэй дүүргийн Цагдаагийн 1 дүгээр хэлтсийн алба хаагчдад "Хөдөлмөрийн аюулгүй байдал, эрүүл ахуйн хууль болон Үйлдвэрлэлийн осол, хурц хордлогыг судлан бүртгэх дүрэм" сэдвээр дүүргийн Хөдөлмөр, халамжийн үйлчилгээний хэлтсийн Хөдөлмөрийн хяналтын улсын байцаагч А.Оюунтүлхүүр мэдээлэл өгч, сургалт зохион байгууллаа. 

Чингэлтэй дүүргийн хүн амын өвчлөлийн байдал, нийгмийн эрүүл мэндийн салбарын тулгамдаж буй асуудлууд, түүнийг шийдвэрлэх арга замыг боловсруулах, эмнэлгийн тусламж үйлчилгээний чанар хүртээмжийг сайжруулахад бодит санал, зөвлөмж гаргах чадавх бүхий Судлаач сувилагч, эмнэлгийн тусгай мэргэжилтнүүдийг бэлтгэх, илтгэх ур чадвар, хүний нөөцийг хөгжүүлэх зорилгоор жил бүр уламжлал болгон зохион байгуулдаг “Судлаач-2024” эрдэм шинжилгээний бага хурлын шилдгүүдийг тодрууллаа.

Тэргүүн байранд:
О.Ариунтуяа, О.Оюунтунгалаг нарын “Мөрний өвдөлтийн үйл ажилгааны бэрхшээлийг үнэлэх сэргээн засах эмчилгээний үр дүнг тооцох нь”

Дэд байранд:
Ж.Буяннэмэх, Ц.Нямсүрэн, Б.Мэндбаяр, З.Янжинлхам нарын “Чингэлтэй дүүргийн Эрүүл мэндийн төвийн ээлжийн сувилагч нарын эрт сэрэмжлүүлэг үнэлгээний мэдлэгийг үнэлэх нь”

Гутгаар байранд:
Я.Пэрэнлиймаа, П.Рагчаа, Я.Ерөөлт, Ж.Өлзийдэлгэр нарын “Өрхийн эрүүл мэндийн төвөөс үзүүлж буй яаралтай тусламж үйлчилгээн дахь сувилагчийн оролцоог судлах нь” сэдэвт эрдэм шинжилгээний бүтээлүүд тус тус шалгарлаа.

Улаанбаатар хот үүсэн байгуулагдсаны 385 жилийн ой, Дэлхийн Өрхийн эмч нарын өдрийг тохиолдуулан анхан шатны эрүүл мэндийн байгууллагын яаралтай тусламжийн бэлэн байдлыг сайжруулах зорилгоор “Дуудлага” арга хэмжээг зохион байгууллаа. Арга хэмжээний нэгдүгээр шатанд дүүргийн 1-24 дүгээр хороодын 16 Өрхийн эрүүл мэндийн төвүүдийн баг оролцож, ур чадвараа сорин өрсөлдсөнөөс 2 дугаар шатны шалгаруулалтад өрсөлдөхөөр нийт 12 Өрхийн эрүүл мэндийн төвийн багууд шалгарлаа.

Дараагийн шатны шалгаруулалт 5 дугаар сарын 12-ны өдөр зохион байгуулагдах бөгөөд дүүргээс шалгарсан Өрхийн эрүүл мэндийн төвийн баг Нийслэлийн шалгаруулалтад оролцох эрхтэй болох юм. “Дуудлага” арга хэмжээг зохион байгуулснаар анхан шатны эрүүл мэндийн байгууллагын яаралтай тусламжийн бэлэн байдлыг сайжруулах, Өрхийн эрүүл мэндийн төвүүдийн эмч, эмнэлгийн ажилтнуудын ур чадварыг дээшлүүлэх, тэдний ажлыг олон нийтэд сурталчлан таниулах ач холбогдолтой юм.