Гэр бүл, найз нөхдөөрөө хотоос ойр байгальд гарахаар төлөвлөж байгаа бол Нийслэл Улаанбаатар хотын хойморт сүндэрлэх Чингэлтэй хайрхны Зүрх Уулыг зориорой. Хотын төвөөс 13 км зайд орших сүрлэг ой мод, уулын фитнес, амрах талбай бүгд цогцолсон Зүрх Ууланд алхах замыг тэгшлэн зассан тул тэрэгтэй хүүхэд түрэхэд, ахмад настан алхахад чилж ядрах нь бага байдаг. Мөн 30-50 алхам тутамд амрах сандал, саад байршуулжээ. Уулын оройд хүрэхэд 500 метр орчим болдог байна.

Зүрх уул руу 3,4-р хороолол, Гандан, Ард кино театр, Peace mall зэрэг автобусны буудлуудаас 23 болон 24А чиглэлийн нийтийн тээвэр өдөр бүр зорчиж байна. Чингэлтэй хайрхан уул нь үргэлжийн мөнхөд наран мандуулсан энгэр ээвэр булаг шандаар баян, ургамал ан амьтнаар элбэг, үзэсгэлэнтэй сайхан хангай юм. Иргэд та бүхэн байгалийн сайханд амарч зугаалахдаа гал алдахаас сэргийлж, хог бүү хаяарай.