ДҮҮРГИЙН ОНЦГОЙ КОМИСС ХУРАЛДЛАА

 Чингэлтэй дүүргийн Онцгой комиссын хуралдаан өнөөдөр боллоо. Хуралдааны эхэнд  дүүргийн Онцгой байдлын хэлтэс, Цагдаагийн газар, ЗДТГ-ын Тохижилт, нийтийн аж ахуйн хэлтэс, Эрүүл мэндийн төвүүдээс 2025 оны эхний сарын байдлаар хийж хэрэгжүүлж буй ажил, арга хэмжээний талаар мэдээлэл хийлээ.

Тухайлбал дүүргийн Онцгой байдлын хэлтэс 2025 оны эхний сарын сард нийт 64 гал түймрийн дуудлага хүлээн авсан байна. Үүний 14 нь дүүргийн хэмжээнд, 50 нь үйлчлэх хүрээний нутаг дэвсгэрт ирж иргэдийн 15 тэрбум 146 сая төгрөгийн эд зүйлийг авран хамгаалжээ. Мөн дүүргийн 9 хорооны 12 байршилд халиа дошин үүссэн газруудад суваг татах, далан босгох хөрсний усны урсцыг чөлөөлөх арга хэмжээ авч ажиллаж ээ.

Дүүргийн нутаг дэвсгэр дэх гэмт хэргийн нөхцөл байдал, хэв журам сахиулах, гэмт хэргээс урьдчилан сэргийлэх чиглэлээр хэрэгжүүлж буй ажлын талаар дүүрэг дэх Цагдаагийн газраас танилцуулж, томуу, томуу төст өвчин болон менингококкын халдварын нөхцөл байдал, тархвар зүй, урьдчилан сэргийлэлт, хариу арга хэмжээний талаар Эрүүл мэндийн төвөөс танилцууллаа. Мөн дүүргийн хэмжээнд зохион байгуулсан хяналт шалгалт, ажлын явц, үр дүн, зохион байгуулалтуудын талаар холбогдох хэлтэс албадын дарга нар мэдээллээ танилцуулан санал солилцлоо.

Дүүргийн Онцгой комиссын орлогч дарга бөгөөд Засаг даргын орлогч З.Бямбажав дүүргийн эрүүл мэндийн байгууллага болон цагдаа, Онцгой байдлын хэлтсийн авч хэрэгжүүлсэн ажлын явц, цаг үеийн мэдээллийг сонсож, комиссын гишүүдэд яаралтай авч хэрэгжүүлэх арга хэмжээний талаар үүрэг даалгавар өглөө.

Үүнд: Дүүргийн нутаг дэвсгэрт булгийн ус газрын хөрснөөс нэвчин гарч халиа дошин үүсэж айл өрх, нийтийн эзэмшлийн зам талбай мөстөж хөлдөхөөс урьдчилан сэргийлэх арга хэмжээг эрчимжүүлэх, халиа дошин үүссэнтэй холбогдуулан нийслэлийн Онцгой комисст гамшгийн шар түвшинд шилжүүлэх саналыг албан бичгээр хүргүүлэх;  

-Сар шинийн баяр, амралтын өдрүүдэд дүүргийн хэмжээнд үүрэг гүйцэтгэх хариуцлагатай эргүүл, жижүүр, бүрэлдэхүүнийг томилж, бэлэн байдлыг хангуулах;

-Сайжруулсан шахмал түлшний агуулах, дундын болон хангамжийн бааз, борлуулалтын цэгүүдийн түлш нөөцлөлтийг сайжруулах, тээвэрлэлтийн үйл ажиллагааг хэвийн тасралтгүй явуулах, гэр хорооллын айл өрхийн сайжруулсан түлшний хэрэглээг жигд хүртээмжтэй хангах ажилд тогтмол хяналт тавьж ажиллах; 

-Гэр хорооллын айл өрхийн зуух, ханан пийшингийн бүрэн бүтэн байдал, сайжруулсан түлш, зөв галлагаа, угаарын хийн хордлогоос урьдчилан сэргийлэх талаар зөвлөмжийг 7-24 дүгээр хороодын айл өрхүүдэд тараах, иргэд, олон нийтэд мэдээлэх, сурталчлах ажлыг үе шаттай зохион байгуулах;

-Хог хаягдлын тухай хэрэгжилтийг хангаж хороодын нутаг дэвсгэрийн аж ахуйн нэгж, байгууллагуудыг эргэн тойрны 50 метр хүртэлх нийтийн эдэлбэр газрын хог хаягдал, цас, мөсийг цэвэрлэх ажлыг зохион байгуулж, хяналт тавьж ажиллах;

-Дүүргийн нутаг дэвсгэрийн нийтийн эзэмшлийн гудамж,  зам талбай, явган замд  цас, мөс, хог хаягдал хуримтлагдахаас урьдчилан сэргийлэн давс, бодисыг нөөцөлж, хог хаягдлыг цаг тухайд нь ачин тээвэрлэх ажлыг шуурхай зохион байгуулж ажиллахыг үүрэг болголоо.