ДУЛААН АЛДАГДЛЫГ БУУРУУЛСНААР ЦАХИЛГААН БОЛОН ТҮЛШНИЙ ЗАРДЛАА 40-65 ХУВЬ БУУРУУЛАХ БОЛОМЖТОЙ

Дүүргийн Засаг даргын санаачилгаар “Дулаалъя” аяныг үе шаттайгаар зохион байгуулан ажиллаж байгаа билээ. Тэгвэл өнгөрсөн хоёрдугаар сарын эд хүйтний өдрүүдэд дүүргийн 15 дугаар хорооны 586 айл өрхийн амины орон сууцын дулаан алдагдлыг хэмжиж, дулаан алдаж буй цэгүүдийг тодорхойлон дата судалгаа цуглуулан ажилласан байна. 

Цуглуулсан дата дээр тулгуурлан дүүргийн 7-24 дүгээр хороодын иргэдэд гэр, байшингаа хэрхэн зөв, үр дүнтэй, хямд зардлаар дулаалах аргуудыг танилцуулах сургалтыг зохион байгууллаа.

Гэр хорооллын бүсийн айл өрхийн байшингийн ихэнх хувь нь 20 гаруй жилийн өмнө баригдсан учир дулаан болон эрчим хүчний алдагдал ихтэй байдаг. Тиймээс дулаан алдагдлыг бууруулж хэмнэлт гаргах зорилгоор дээрх сургалтыг “Дулаан шийдэл” ТББ-тай хамтран хэрэгжүүллээ.

Сургалтад дүүргийн 7-24 дүгээр хороодын 520 гаруй иргэд хамрагдаж өөрсдийн байшин сууцын дулаан алдагдлыг хэрхэн таньж мэдэх, дулаан алдагдал явагдсанаар эрүүл мэндэд ямар хор хохирол учирдаг, хана, шал, дээвэр, янданг хэрхэн дулаалах, дулаалгын материалуудыг хэрхэн сонгох, дулаалгатай холбоотой мэдээ мэдээллийг ямар сувгаар хүлээн авах боломжтой талаар мэдээ мэдээлэл хүргэлээ. 

“Дулаалъя” аяны зорилго гэр хорооллын бүсийн айл өрхийн дулаан алдагдлыг шийдэх, агаар, орчны бохирдол болон цахилгаан, түлшний зардлыг хэмнэх гол ач холбогдолтой юм.  Дулаан алдагдлын шийдэж чадвал өрх бүр өвлийн улиралд түлш болон цахилгааны зардлаа 40-65 хувиар бууруулах боломжтой юм.