УДИРДАХ АЖИЛТНЫ ЭЭЛЖИТ ШУУРХАЙ ЗӨВЛӨГӨӨН БОЛЛОО

Чингэлтэй дүүргийн удирдах ажилтны ээлжит шуурхай зөвлөгөөн өнөөдөр боллоо.  Шуурхай зөвлөгөөнийг дүүргийн Засаг дарга Н.Мандуул удирдан явууллаа.

Зөвлөгөөний эхэнд өмнөх хуралдаанаар өгсөн үүрэг даалгаврын биелэлтийг танилцууллаа. Өнөөдрийн зөвлөгөөнд Хот байгуулалт, хотын стандарт газрын  Хотын стандарт, хөгжлийн хэлтсийн мэргэжилтэн М.Цолмон “Хотын стандарт, түүний хэрэгжилт, III ээлжийн хотын стандарт танилцуулгыг дүүргийн удирдлагуудад мэдээлэл хийлээ.

Дүүргийн Засаг дарга Н.Мандуул удирдах ажилтнуудад үүрэг даалгавар өглөө. Олон Улсын Хүүхдийн эрхийг хамгаалах өдрийн нэгдсэн арга хэмжээг зохион байгуулах батлагдсан төлөвлөгөөний дагуу хариуцсан ажлуудаа үр дүнтэй хэрэгжүүлэх, Дүүргийн Эрүүл мэндийн төв, хороодын Өрхийн эрүүл мэндийн төвүүдийн гадна орчны аюулгүй байдал болон дотоод орчны угаалга, цэвэрлэгээ, ариутгал, халдваргүйжүүлэлт, шавж, мэрэгч устгалын үйл ажиллагаанд онцгой анхаарч ажиллах, хуурайшилт ихтэй байгаа тул дүүргийн хэмжээнд ой, хээрийн түймрээс урьдчилан сэргийлэх, сэрэмжлүүлэх ажлуудыг тогтмол зохион байгуулах ажлыг даалгав.

Мөн дүүргийн нутаг дэвсгэрийн хэмжээнд гэмт хэрэг зөрчлөөс урьдчилан сэргийлэх, нийгмийн хэв журмыг сахиулах ажлыг шуурхай зохион байгуулж, дараагийн шуурхай зөвлөгөөн дээр товч танилцуулга хийх, гэр хорооллын агаарын бохирдуулагч эх үүсвэр буюу зуухны тооллогыг хороодын Засаг дарга нар тоолж ирүүлэх, дүүргийн орчин тойронд байгаа бодит асуудлыг мэдээлэх, санал хүсэлт илгээх “Шинэ Чингэлтэй” сайтыг ажилтан албан хаагчид болон иргэд, олон нийтийг идэвхтэй хамруулж, иргэдийн санал хүсэлтийг авч ажиллахыг даалгалаа.

“Дулаалга” аян эхэлж байгаатай холбоотойгоор хороодын Засаг дарга нар өнгөрсөн судалгаагаар байшингаа дулаална гэсэн айлуудтай холбогдож ажил эхлүүлэх хүсэлтэй айлуудын бэлэн байдлыг хангуулах, мөн хүүхдийн эрхийг хамгаалах өдөр болох гэж буйтай холбогдуулан нийслэлээс ирсэн чиглэлийн дагуу 5-р сарын 31, 6-р сарын 01-ний өдрүүдэд архи, тамхи худалдахгүй, үйлчлэхгүй байх тал дээр хорооны нутаг дэвсгэрт үйл ажиллагаа явуулж буй иргэн, аж ахуйн нэгж, байгууллагад мэдээлэл хүргэх, хяналт тавьж ажиллахыг үүрэг болголоо.