“НҮҮДЭЛЧИН-2025” ДЭЛХИЙН СОЁЛЫН ФЕСТИВАЛИЙН ЭХНИЙ ШАТНЫ ШАЛГАРУУЛАЛТАД ДҮҮРГИЙН ӨВ ТЭЭГЧИД ӨРСӨЛДӨӨ

“Нүүдэлчин” дэлхийн соёлын фестиваль нь үндэсний өв уламжлалаа түгээн дэлгэрүүлэх, залуу хойч үедээ өвлүүлэн үлдээх зорилго дор жил бүр өргөжин тэлж байгаа олон улсын соёлын фестиваль юм. Энэ фестивальд Чингэлтэй дүүргийг төлөөлөн оролцох өв тээгчдийг сонгон шалгаруулах эхний шатны шалгаруулалт өнөөдөр боллоо. Эхний шатны шалгаруулалтад дүүргийн өвлөн уламжлагчид:

1.     Эх хэл, аман уламжлал, илэрхийллүүд
2.     Ардын язгуур урлаг
3.     Уламжлалт баяр наадам, зан үйл, ёс тоглоом наадгай, уриа дуудлага
4.     Байгалийн болон сав ертөнцийн тухай мэдлэг, зан үйл
5.     Уламжлалт арга ухаан
6.     Мал, маллах арга ухаан
7.     Уламжлалт гар урлал гэсэн долоон ай савын хүрээнд авьяас, ур ухаанаа сорин оролцжээ.

Танхимд гар урлаачид эсгийгээр хийсэн гутал, малгай, модон шатар, мал амьтны дүрс бүхий баримал, сураар сүлжсэн морины эд хэрэглэл, үндэсний хувцас зэргийг хана дагуулан дэлгэн тавьжээ. Харин гол тайзнаа хөөмий, аман хуур, уртын дуу, бие биелгээ зэрэг соёлын биет бус өвийг толилуулсан юм.

Оролцогчдын хамгийн залуу өв тээгч нь 9 настай Э. Ивээл. Тэрээр ээж, эгчээрээ зоосон ширээний сүлжмэл, зүү ороох хатгамлыг заалган даалин, шагайн уут зэргийг чимэглэн урлаж гар урлал төрөлд өрсөлдсөн юм.

Энэхүү зоосон ширээний сүлжмэл нь хоёр гарыг зэрэг ажиллуулдаг учир баруун, зүүн тархийг хамтад нь хөгжүүлэх, хүүхдийг төлөвшүүлэх өндөр ач холбогдолтой соёлын биет бус өвд тооцогддог байна. Энэ мэт залуу өвлөн тээгчдээс авхуулаад өндөр буурай үе дамжсан өвлөн уламжлагч нар эхний шатны шалгаруулалтад өрсөлдлөө.

 

Дүүргээс зохион байгуулсан уг шалгаруулалтад тэнцсэн өвлөн тээгч нар 8 дугаар сарын 22-24-ний өдөр Тайж хайрхан уулын бэлд болох дэлхийн соёлын “Нүүдэлчин” фестивальд Чингэлтэй дүүргээ төлөөлөн оролцох юм. Энэ жилийн тухайд “Нүүдэлчин” дэлхийн соёлын фестивалийг Монгол Улсын соёлын биет бус өвийн олон төрөл зүйл, угсаатны бүлгийн онцлогийг таниулан сурталчлах зорилгоор отог хэлбэрээр зохион байгуулахаар онцлог юм.