НИЙГМИЙН ХАРИУЦЛАГЫН ХҮРЭЭНД 1000 МОД ХАНДИВЛАСАН АЖ АХУЙН НЭГЖҮҮДЭД ТАЛАРХАЛ ГАРДУУЛЛАА

Гэр хорооллын бүсэд иргэд амарч зугаалах, хүүхэд багачуудад эрүүл аюулгүй орчинд тоглож наадах, чөлөөт цагаа зөв боловсон өнгөрүүлэх ногоон орчин дутагдалтай байгаатай холбогдуулан иргэд өөрсдийнхөө хашаанд мод тарьж ургуулах, ногоон төгөл байгуулах аяныг эхлүүлсэн. Энэ оны хаврын тарилтаар дүүргийн 500 өрх хашаандаа 2500 улиас тарьсан бол энэ намрын тарилтаар үргэлжлүүлэн 1000 модыг гэр хорооллын өрхүүд хашаандаа тарих юм.

Энэхүү аянд нэгдэж нийгмийн хариуцлагын хүрээнд 1000 мод хандивласан аж ахуйн нэгжүүдэд ТАЛАРХАЛ гардууллаа.

Тэрбум мод үндэсний хөдөлгөөнийг хэрэгжүүлэх ажлын хүрээнд дүүргийн нэг хүнд ногдох ногоон байгууламжийн хэмжээг нэмэгдүүлэх, орчны бохирдлыг бууруулах, иргэдийн ая тухтай орчинд ажиллах, амьдрах, амрах нөхцлийг бүрдүүлэхэд иргэн, төр, хувийн хэвшлийн бүхий л аж ахуй нэгж байгууллагуудын оролцоог ханган ажиллаж байна.

Ногоон байгууламжийг нэмэгдүүлэх чиглэлээр энэ жил хаврын тарилтаар 15 төрлийн 45,529 мод, сөөг тарьж 14,000м2 талбайг шинээр зүлэгжүүлж ногоон байгууламжийн талбайн хэмжээг 1,2 га талбайгаар нэмэгдүүлсэн байна.

Харин энэ удаагийн намрын тарилтын ажлыг "Ургасан л бол усалсан" уриан дор хэрэгжүүлж байна. Өмнөх жилүүдэд тарьсан мод, сөөгөнд цэнэг усалгаа хийх, тогоог нь цэвэрлэх, хөрсийг сийрүүлэх, арчлан хамгаалах арга хэмжээг зохион байгуулахыг нийтэд уриалж байна.