ЭРЧИМ ХҮЧНИЙ ХЭМНЭЛТТЭЙ ЦОНХ ШИЛЭН ХИЙЦЛЭЛИЙГ АЙЛ ӨРХҮҮДЭД НЭВТРҮҮЛЖ ЭХЭЛЛЭЭ

Дүүргийн хэмжээнд эрчим хүчний хэмнэлттэй цонх шилэн хийцлэлийг айл өрхүүдэд нэвтрүүлж, дулаан алдагдлыг бууруулах зорилтот ажил өнөөдрөөс эхэллээ.

Чингэлтэй дүүргийн Засаг даргын Тамгын газар “Эрчим хүчний хэмнэлттэй цонх, шилэн хийц үйлдвэрлэгчдийн нэгдсэн холбоо”-той хамтын ажиллагааны санамж бичиг байгууллаа. Санамж бичигт Чингэлтэй дүүргийн Засаг дарга Н.Мандуул, тус холбооны Ерөнхийлөгч Л.Гантөмөр нар оролцон гарын үсэг зурлаа.

Судалгаагаар байшин, сууцны нийт дулаан алдагдлын 15–20 хувийг цонх, шилэн хийцийн дулаан алдагдал эзэлдэг байна. Айл өрхүүд дээвэр, хана, сууриа бүрэн дулаалсан ч чанар, стандартын шаардлага хангаагүй цонх, шилэн хийцээс дулаан алдаж байгаагаа төдийлөн анзаардаггүй тохиолдол цөөнгүй.

Иймд Чингэлтэй дүүргийн зүгээс “Эрчим хүчний хэмнэлттэй цонх, шилэн хийц үйлдвэрлэгчдийн нэгдсэн холбоо”-той хамтран дараах чиглэлээр хамтран ажиллахаар тохиролцлоо. Тухайлбал:

-Цонхны дулаалга хийж буй айл өрхүүдэд мэргэжлийн арга зүйн зөвлөгөө өгөх

-Цонх, шилэн хийцийн дулаан алдагдал, эрчим хүчний хэмнэлтийн талаар сургалт, мэдээлэл зохион байгуулах

-Чанар, стандартад нийцсэн эрчим хүчний хэмнэлттэй цонх, шилэн хийцлэлийг нэвтрүүлж, олон нийтэд сурталчлах

-Баригдсан хуучин амины орон сууцны цонх, шилийг эрчим хүчний хэмнэлттэй шилэн хийцлэлээр солих замаар үл хөдлөх хөрөнгийн үнэ цэнийг нэмэгдүүлэх зэрэг зорилтот ажлууд тусгагдлаа.

Гурван жилийн хугацаатай хамтын ажиллагааны гол зорилго нь айл өрхүүдийн дулаан алдагдлыг бууруулж, эрчим хүчний хэрэглээг нэвтрүүлэх замаар агаарын бохирдлыг бууруулах, иргэдийн амьдрах орчны чанарыг сайжруулахад бодитой хувь нэмэр оруулах ач холбогдолтой юм.