ЧИНГЭЛТЭЙ ДҮҮРГИЙН ХАМТРАН ХЭРЭГЖҮҮЛЖ БУЙ "ДЭЭРЭЛХЭЛТИЙГ ТАНЬЖ МЭДЬЕ" АМЖИЛТТАЙ ХЭРЭГЖИЖ БАЙНА

Чингэлтэй дүүргийн хамтран хэрэгжүүлж буй "Дээрэлхэлтийг таньж мэдье" төсөл дүүргийн 23,72,37 дугаар сургуулиудад амжилттай хэрэгжиж байна.

Төслийн гол зорилго нь сургуулийн орчинд дээрэлхэлтийг үл тэвчих соёл төлөвшүүлэх, сургуулийн захиргаа, багш, эцэг эхийн оролцоотой дээрэлхэлтийн эсрэг цогц тогтолцоо бэхжүүлэх зорилготой.

Өнгөрсөн хоёр долоо хоногийн хугацаанд гурван сургуулийн нийт багш, ажилчдад "Дээрэлхэлтийг таньж мэдье" сургалт, анги удирдсан багш нарт "Үлгэрээр дамжуулан дээрэлхэлтийг таньж мэдэх" арга зүйн сургалтыг тус тус орлоо.

 

Төслийн онцлог нь уламжлалт танхимын сургалтаас илүүтэй хүүхдүүдийн багадаа уншиж өссөн үлгэрүүдээр дамжуулан дээрэлхэлтийн талаар ойлгуулахад чиглэнэ. Учир нь бидний мэдэх олон үлгэрт дээрэлхэгчийн дүр байдаг ч бид ихэвчлэн аз жаргалтай төгсгөлд нь анхаарлаа төвлөрүүлдэг. Гэвч Үнсгэлжин гадуурхалт, доромжлолын бай болж, Нугасны муухай дэгдэхийг “өөр” харагддаг хэмээн шоолж сүргээсээ түлхэн хавчиж буй үйлдлүүд нь бусдад ямар гүн сэтгэлзүйн шарх үлдээдэг талаар төдийлөн анзаардаггүй байна.

 

Төслийн хугацаанд дэлхийн алдарт 15 үлгэрийг сонгон авч, хүүхдүүдтэй “хэн нь зөв, хэн нь буруу вэ” гэж дүгнэхээс илүү “энэ үйлдэл яагаад дээрэлхэлт вэ?”, “ийм нөхцөлд чи юу хийх байсан бэ?” гэсэн ойлголтыг өгөхөөр зорьж байна. Ингэснээр хүүхдүүд урьд нь зөвхөн “Муухай дэгдэхэй үзэсгэлэнт хун болсон” төгсгөлд баярладаг байсан бол одоо тэр үлгэрийн цаана нуугдсан ганцаардал, шаналал, ялгаварлан гадуурхалтыг илүү мэдэрч, бусдыг ойлгох хандлагад суралцах юм.

 

 

Арга зүйн сургалтад хамрагдсан багш нар ангийн хүүхдүүдийн хамт сургалтад ашигласан үлгэрээр дамжуулан дүр бүтээн Олон улсын хүүхдийн эрхийг хамгаалах өдрийг угтан бусдадаа жүжигчлэн тоглож үзүүлнэ.

Цаашид төслийн загварыг дүүргийн бусад сургуулиудад нэвтрүүлж ажиллана.