“МИНИЙ ЭРХ-МИНИЙ ЭРҮҮЛ МЭНД-МИНИЙ ИРЭЭДҮЙ” ОХИДЫН СУРГАЛТ, НӨЛӨӨЛЛИЙН АРГА ХЭМЖЭЭ ЗОХИОН БАЙГУУЛЛАА.

“МИНИЙ ЭРХ-МИНИЙ ЭРҮҮЛ МЭНД-МИНИЙ ИРЭЭДҮЙ” ОХИДЫН СУРГАЛТ, НӨЛӨӨЛЛИЙН АРГА ХЭМЖЭЭ ЗОХИОН БАЙГУУЛЛАА.

Чингэлтэй дүүргийн Жендэрийн салбар хорооны 2026 оны үйл ажиллагааны төлөвлөгөөний хэрэгжилтийг хангах хүрээнд Чингэлтэй дүүргийн Засаг даргын Тамгын газраас Чингэлтэй Нэгдсэн эмнэлэг, Насан туршийн суралцахуйн төвтэй хамтран өсвөр насны охидын нөхөн үржихүйн эрүүл мэндийн боловсролыг нэмэгдүүлэх, жендэрийн талаарх ойлголт, мэдлэгийг дээшлүүлэх, өөртөө итгэх итгэл, эрүүл зөв хандлагыг төлөвшүүлэх зорилгоор “Миний эрх, Миний эрүүл мэнд, Миний ирээдүй” сэдэвт сургалт, нөлөөллийн арга хэмжээг 2026 оны 05 дугаар сарын 15-ны өдөр Чингэлтэй дүүргийн Соёлын төвд зохион байгууллаа.

Үйл ажиллагааг Чингэлтэй дүүргийн Засаг даргын Тамгын газрын Нийгмийн хөгжлийн хэлтсийн дарга Л.Баярмаа нээж, өсвөр насны охидыг өөртөө итгэлтэй, эрүүл зөв хандлагатай, мэдлэгтэй иргэн болон төлөвшихийг уриаллаа.

Тус арга хэмжээнд дүүргийн 1-24 дүгээр хороодын 13-18 насны нийт 200 өсвөр насны охид хамрагдлаа.

Сургалтын хүрээнд: Дүүргийн Насан туршийн суралцахуйн төвийн багш Ц.Сарангэрэл “Жендэрийн эрх тэгш байдал” сэдвээр, Чингэлтэй Нэгдсэн эмнэлгийн Хөтөлбөр арга хэмжээ хариуцсан зохицуулагч Ө.Ариунаа “Охидын нөхөн үржихүйн эрүүл мэнд” сэдвээр, БЗДХ-ын эрхлэгч Б.Мөнхбаяр “БЗДХ-аас сэргийлэх нь” сэдвээр, Насан туршийн суралцахуйн төвийн багш Б.Одбаяр “Өөртөө итгэх итгэл ба охидын манлайлал” сэдвээр тус тус мэдээлэл, зөвлөгөө өглөө. 

Арга хэмжээний үеэр оролцогч охидын идэвх оролцоог дэмжих зорилгоор хөгжөөнт дасгал, идэвхжүүлэх үйл ажиллагаа явуулж, оролцогч охидод ариун цэврийн хэрэглэлийн багц гардуулж, эрүүл мэндийн боловсрол олгох гарын авлага, мэдээлэл, зөвлөмж хүргэсэн юм.