Стратегийн Команд штабын сургалт зохион байгуулах ажлын хүрээнд Чингэлтэй дүүргийн Онцгой байдлын хэлтсээс Цагдаагийн Ерөнхий газрын Зөрчлийн хэрэг бүртгэлт, мэргэжил аргазүйн хэлтсийн албан хаагчдад сургалт зохион байгууллаа.

“Газар хөдлөлтийн гамшгийн аюулаас урьдчилан сэргийлэх, авах арга хэмжээ" сэдэвт сургалтад 42 албан хаагч хамрагдлаа.

Мөн энэ үеэр тус байгууллагын алба хаагчид ой хээр, өнжмөл шар өвсний гал түймрээс урьдчилан сэргийлэх #шар_өвс_шатахуунтай_адил_шатна аянд нэгдлээ.

Хөгжлийн бэрхшээлтэй хүний эрхийг хамгаалахад чиглэсэн төрөөс хэрэгжүүлж буй бодлого, шийдвэр, хэрэгжилт, халамжийн болон бусад үйлчилгээний хүртээмжийг нэмэгдүүлэх, хөгжлийн бэрхшээлтэй иргэдийн санал хүсэлтийг сонсох зорилгоор Чингэлтэй дүүргийн Засаг даргын Тамгын газар, Хөдөлмөр халамж үйлчилгээний хэлтэс хамтран “Хамтдаа оролцъё, хамтдаа хөгжье-2” уулзалт хэлэлцүүлгийг зохион байгууллаа.

Уулзалт хэлэлцүүлэгт дүүргийн 1-24 дүгээр хороодын хөгжлийн бэрхшээлтэй иргэд, төрийн болон төрийн бус байгууллага, хөдөлмөр эрхлэлтийг дэмжих хөтөлбөрийн үр шимийг хүртсэн иргэд оролцож дуу хоолойгоо хүргэлээ.
Хэлэлцүүлэгт Чингэлтэй дүүргийн Засаг дарга Н.Батсүмбэрэл, Монгол Улсын Ерөнхий сайдын Нийгмийн хөгжлийн асуудал эрхэлсэн зөвлөх Ч.Ундрахбаяр, Чингэлтэй дүүргийн Хөдөлмөр халамж үйлчилгээний хэлтсийн дарга А.Сэрээтэр болон бусад албаны хүмүүс оролцлоо.

Чингэлтэй дүүрэгт 4400 гаруй хөгжлийн бэрхшээлтэй иргэд байгаагаас 500 гаруй нь хүүхэд юм. Эдгээр хүмүүсийн нийгмийн баталгааг хангах, тэдэнд чиглэсэн төрийн үйлчилгээний талаар болон дүүргийн зүгээс хийж хэрэгжүүлж буй ажлын талаар мэдээлэл өглөө. Төрийн байгууллагаас хөгжлийн бэрхшээлтэй иргэдэд үзүүлж буй бодлого шийдвэр, тэдний онцлогт тохирсон хүний нөөцийн тогтвортой байдал, бизнес эрхлэх боломжийн талаар ярилцаж, хамтран санал солилцов.

Мөн дүүргээс хэрэгжүүлсэн арга хэмжээ, гарааны бизнес эрхлэгчдийн дэмжсэн хөтөлбөрт хамрагдаж үр шимийг нь хүртсэн хөгжлийн бэрхшээлтэй иргэд харилцан туршлага солилцож, зөвлөмж зөвлөгөө өгч, хамтран шийдэлд хүрэх талаар ярилцлаа.

Хэлэлцүүлгийн үеэр иргэдэд зориулсан эрүүл мэндийн тусламж үйлчилгээ, улсын бүртгэл, нийгмийн даатгал, татвар, хөдөлмөр, халамжийн үйлчилгээний чиглэлээр төрийн үйлчилгээг хүргэж, үйлдвэрлэл эрхлэгч, тус иргэд, үйлдвэрлэгчид үйлдвэрлэсэн бүтээгдэхүүнээрээ үзэсгэлэн гаргалаа.

Хөдөлмөрийн тухай хуулийн 16.1.6 дахь заалт, Хөдөлмөр нийгмийн түншлэлийн гурван талт үндэсний хорооны 2022 оны 5 дугаар тогтоолоор батлагдсан “Сум, дүүргийн хөдөлмөрийн эрхийн маргаан зохицуулах гурван талт хорооны дүрэм”-ийн 2.6 дахь хэсэгт заасны дагуу Чингэлтэй дүүрэгт Хөдөлмөрийн эрхийн маргаан зохицуулах гурван талт хороо байгуулагдсан.

Дүүргийн Хөдөлмөрийн эрхийн маргаан зохицуулах гурван талт хороо өнөөдөр ээлжит хурлаа хуралдуулж, долоон иргэний асуудлыг хэлэлцэн, холбогдох шийдвэрийг гаргалаа.

Хөдөлмөрийн эрхийн маргаан зохицуулах гурван талт хороо нь Хөдөлмөрийн маргаанаас урьдчилан сэргийлэх, шүүхийн өмнөх шатанд эвлэрүүлэн зуучлах үүрэгтэй бөгөөд долоо хоног бүр хуваарийн дагуу хуралдаж, хүсэлт ирүүлсэн иргэдийн асуудлыг хуулийн хугацаанд хэлэлцэн шийдвэрлэж байна.

Монгол Улсын Засгийн газар, НҮБ-ын Хүн амын сангийн хамтран хэрэгжүүлж буй “Жендерт суурилсан хүчирхийлэлтэй тэмцэх нь” төслөөс зарласан бичил төслийн уралдаанд “Чингэлтэйчүүд сайн сайханд дагуулна” төсөл шалгарлаа.

Дүүргийн Жендэрийн салбар хороо нь Чингэлтэй дүүргийн Засаг даргын 2020-2024 оны мөрийн хөтөлбөрийн хүний хөгжлийн бодлогыг хэрэгжүүлэх ажлын хүрээнд Швейцарын хөгжлийн агентлагийн дэмжлэгтэйгээр хэрэгжсэн тус төсөлд оролцсон юм.

Төслийн тэтгэлгийг Жендэрийн үндэсний хорооны Ажлын албаны дарга Т.Энхбаяр, НҮБ-ын Хүн амын сангийн тэргүүн Халид Шарифи нар дүүргийн Жендэрийн салбар хорооны гишүүн Т.Түвшинжаргалд гардуулан өглөө.

“Чингэлтэйчүүд сайн сайханд дагуулна” төсөл нь өнөөгийн нийгэмд тулгамдаж буй гэр бүлийн хүчирхийлэл, эрэгтэйчүүдийн жендэр, хүний эрх, иргэдийн жендэрийн талаарх зөв ойлголт, мэдлэгийг нэмэгдүүлэх, нийгмийн бүх түвшинд, бүх төрлийн хүчирхийллээс урьдчилан сэргийлэх, таслан зогсоох үйл ажиллагаанд эрэгтэйчүүдийг үр дүнтэйгээр татан оролцуулах, өсвөр үеийн хөвгүүдэд нөлөөлөх сайн туршлагыг бий болгон, соён гэгээрүүлэх олон талт ажлыг зохион байгуулж ажиллах зорилготой юм.

Монгол Улсын Шадар сайдын 06 дугаар тушаалаар ирэх тавдугаар сарын 24-26-ны өдрүүдэд газар хөдлөлтийн “Стратегийн команд штабын сургууль”-ийг зохион байгуулах бэлтгэл ажлын явцтай холбогдуулан Чингэлтэй дүүргийн Засаг дарга Н.Батсүмбэрэл, Засаг даргын орлогч Д.Отгонбаатар нартай ОБЕГ-ын АУГ-ын хэлтсийн дарга, хурандаа Ж.Дамдинсүрэн, Бодлого төлөвлөлтийн газрын ахлах мэргэжилтэн, дэд хурандаа М.Батмөнх нар уулзаж санал солилцож, зөвлөгөө өгч ажиллалаа.

Чингэлтэй дүүргийн 1-24 дүгээр хороодын төрийн албан хаагчид, хэсгийн ахлагч нартай дүүргийн удирдлагууд хуваарьт уулзалтыг зохион байгууллаа.

Өнөөдөр 12, 13, 15 дугаар хороодын төрийн албан хаагчид, хэсгийн ахлагчидтай хийсэн уулзалтад Засаг даргын Тамгын газрын дарга П.Баянбаатар, Төрийн захиргааны удирдлагын хэлтсийн дарга Л.Баярмаа нар оролцож, хэрэгжүүлж буй үйл ажиллагаа, хөрөнгө оруулалтын ажлуудын талаар танилцуулллаа.

Мөн ажилтан албан хаагчид, хэсгийн ахлагчдад тулгарч буй хүндрэл бэрхшээлтэй болон ажиллах орчин, нөхцөл байдлын талаар санал солилцлоо. Бусад хороодтой уулзах уулзалт хуваарийн дагуу үргэлжилнэ.

“Стратегийн команд штабын сургуул”-ийн ажлын хүрээнд дүүргийн гамшгаас хамгаалах алба, мэргэжлийн ангийн ажилтан алба хаагчдад хуваарийн дагуу гамшгаас хамгаалах сургалтыг зохион байгуулж байна.

Чингэлтэй дүүргийн Онцгой байдлын хэлтсээс “Улаанбаатар цахилгаан түгээх сүлжээ” ХХК-ийн “Чингэлтэй хэрэглэгчдэд үйлчлэх төв”-ийн ажилтан алба хаагчдад газар хөдлөлт, гал түймэр гарсан тохиолдолд авах арга хэмжээ сэдвээр сургалт зохион байгууллаа.

Сургалтад тус байгууллагын 74 ажилтан албан хаагч хамрагдаж, гал унтраагуур ашиглан гарсан гал түймрийг унтраах дадлага хийж, бэлэн байдлын цүнхний иж бүрдлийг шалгуулж, Онцгой байдлын хэлтсээс зөвлөмж, мэдээлэл авлаа.

Монгол Улсын Засгийн газраас зарласан цахим шилжилтийг эрчимжүүлэх, авлига, хүнд суртлыг арилгах “Шил ажиллагаа"-ны хүрээнд “Шилэн төр, цахим шилжилтэд таны оролцоо” сэдэвт уулзалтыг өнөөдөр буюу дөрөвдүгээр сарын 18-ны өдөр Цахим хөгжил, харилцаа холбооны яам, нийслэлийн Засаг даргын Тамгын газар хамтран Чингэлтэй дүүргийн 500 гаруй орчим төрийн албан хаагчдыг хамруулан зохион байгууллаа.

Уулзалтаар цахим шилжилтэд төрийн албан хаагчдын идэвх оролцоог сайжруулах, ойлголтыг нэмэгдүүлснээр төрийн байгууллагын үйл ажиллагааны ил тод байдлыг хангаж, төрийн үйлчилгээний хүртээмжийг нэмэгдүүлж, төрөл бүрийн зөвшөөрлийг олгох үйл явцыг цахимжуулах талаар Засгийн газар, Цахим хөгжил, харилцаа холбооны яам, нийслэлийн Засаг даргын Тамгын газраас хэрэгжүүлж буй бодлого, арга хэмжээний талаар дүүргийн төрийн албан хаагчдад дэлгэрэнгүй мэдээ, мэдээллийг өглөө.

Уулзалтын үр дүнд Чингэлтэй дүүргийн Засаг дарга Н.Батсүмбэрэл Чингэлтэй дүүрэг шилэн дүүрэг болж цахим шилжилтийг манлайлан ажиллахаа зарлалаа.

Тухайлбал, иргэдэд хүргэж байгаа төрийн үйлчилгээг цахимжуулах, хялбаршуулах чиглэлээр төрийн байгууллагууд уялдаа холбоогоо сайжруулж цахим, шилэн дүүрэг болно хэмээн тодотголоо.

Монгол Улсын Засгийн газраас 2023 оныг авлигатай тэмцэх жил болгон зарласан билээ. Цахим шилжилтийг эрчимжүүлэх, авлига, хүнд суртлыг арилгах “Шил ажиллагаа"-ны хүрээнд “Шилэн төр, цахим шилжилтэнд таны оролцоо” сэдэвт уулзалтыг Чингэлтэй дүүргийн 500 гаруй төрийн албан хаагчдад зохион байгууллаа.

Уулзалтыг Цахим хөгжил, харилцаа холбооны яам, нийслэлийн Засаг даргын Тамгын газар хамтран зохион байгуулж байгаа бөгөөд уулзалтад ЦХХХ-ны сайд Н.Учрал, Монгол Улсын сайд, нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар, УИХ-ын гишүүн, УИХ дахь МАН-ын бүлгийн дэд дарга М.Оюунчимэг, Нийслэлийн засаг дарга бөгөөд Улаанбаатар хотын захирагч Д.Сумъяабазар, Чингэлтэй дүүргийн Засаг дарга Н.Батсүмбэрэл болон холбогдох албаныхан оролцож, дүүргийн төрийн албан хаагчдад мэдээлэл өглөө.

Шилэн төр, цахим шилжилтийн хүрээнд Чингэлтэй дүүрэгт хийж хэрэгжүүлж байгаа ажлын талаар дүүргийн Засаг дарга Н.Батсүмбэрэл уулзалтыг нээж танилцуулга мэдээлэл хийлээ.

Тухайлбал Чингэлтэй дүүрэг гэмт хэргээс урьдчилан сэргийлэх, зорилгоор дүүргийн 1, 2, 3, 12 дугаар хорооны 51.7 га талбай бүхий нутаг дэвсгэрийг камерын бүрэн хяналтанд оруулж “Ногоон бүс” болгоод байна.

“Ногоон бүс” аяны хүрээнд нийт 117 цэгт 357 камерыг суурилуулж гэмт хэрэг зөрчлийн дуудлага мэдээлэл 48.6 хувиар буурсан үзүүлэлттэй байна. 

Энэ онд 4, 5, 6, 7, 9, 19, 20, 21, 22, 24 дүгээр хороодыг бүрэн камержуулахаар ажиллаж байна.

Чингэлтэй дүүргийн 1-24 дүгээр хороодын төрийн албан хаагчид, хэсгийн ахлагч нартай хийж байгаа уулзалт үргэлжилж байна.

Уулзалтаар дүүргийн Засаг даргын Тамгын газрын дарга П.Баянбаатар, Төрийн захиргааны удирдлагын хэлтсийн дарга Л.Баярмаа нар хороо бүрээр явж ажиллаж байгаа юм. 2023 оны 04 дүгээр сарын 17-ны өдөр 16, 17 дугаар хорооны ажилтнуудтай уулзлаа.

Уг уулзалт нь дүүргээс 2023 онд хийж хэрэгжүүлж буй үйл ажиллагаа, хөрөнгө оруулалтын ажлуудын талаар танилцуулж ажилтан албан хаагчид, хэсгийн ахлагчдад тулгарч буй хүндрэл бэрхшээлтэй болон ажиллах орчин, нөхцөл байдлын талаар санал солилцох зорилготой юм.

Уулзалтад хороодын Засаг дарга, зохион байгуулагч болон нийгмийн ажилтан, хөдөлмөр халамжийн мэргэжилтэн, улсын бүртгэгч, харьяа сургууль цэцэрлэгийн захирал, эрхлэгч, өрхийн эрүүл мэндийн төвийн дарга нар идэвхтэй оролцож байна.

Жэрэс Олон Улсын Байгууллага, Монголын Эмэгтэйчүүдийн Сантай хамтран Европын холбооны Свиш Азиа-II хөтөлбөрийн дэмжлэгтэйгээр “Дулаан шийдэл-II” төслийг 2022-2026 онуудад хэрэгжүүлж байна.

Уг төсөл нь байгальд ээлтэй, дэвшилтэт технологиор гэр хорооллын айл өрхүүдийн байшин сууцыг дулаалах, эрчим хүчний хэмнэлттэй дулаалгын системтийг нэвтрүүлэх зорилготой юм. “Дулаан шийдэл-I” төслийг 2018-2022 онуудад амжилттай хэрэгжүүлж, Сонгинохайрхан, Баянзүрх дүүргийн нийтдээ 2000 айл өрхийг хамруулсан бөгөөд энэ онд Чингэлтэй дүүрэгт хэрэгжүүлэхээр төслийн багийнхан дүүргийн удирдлагуудтай санал солилцож, хамтран хэрэгжүүлэхээр боллоо.

Өнөөдөр Чингэлтэй дүүргийн Засаг даргын Тамгын газрын дарга П.Баянбаатар, Жэрэс ОУБ-ын суурин төлөөлөгч Элиан Жарри, Монголын Эмэгтэйчүүдийн Сангийн гүйцэтгэх захирал Б.Агни нар төслийг хэрэгжүүлэх “Хамтын ажиллагааны санамж бичиг”-т гарын үсэг зурж зорилтот хороодод төслийг хэрэгжүүлэхээр хамтын ажиллагаагаа албан ёсоор эхэллээ.

Энэхүү төсөлд Барилгын үндэсний ассоциаци, ШУТИС-ийн харьяа Барилгын эрчим хүчний хэмнэлтийн төв, Монголын ногоон санхүүжилтийн корпораци хамтран оролцож байна.

Чингэлтэй дүүргийн Засаг даргын нэрэмжит цэрэг-спортын “ДӨЛ” тэмцээний шилдгүүд тодорч, шагналаа гардан авлаа. Дүүргийн аварга шалгаруулах “Дөл-2023” цогцолбор тэмцээний шагнал гардуулах ёслолын ажиллагаанд Чингэлтэй дүүргийн Засаг дарга бөгөөд Батлан хамгаалах товчооны дарга Н.Батсүмбэрэл, Засаг даргын орлогч Д.Отгонбаатар, Цэргийн Штабын дарга Г.Ялалт, дүүргийн Цэргийн штабын дарга Н.Энхбат болон бусад албаны хүмүүс оролцлоо.

Монгол Улсын Тусгаар тогтнол, эх орноороо бахархах үзлийг төлөвшүүлэх, цэрэг эх оронч хүмүүжил олгох, өсвөр залуу үеийнхэнд бие бялдар, сэтгэл зүйн бэлтгэл, тэвчээр хатуужил олгох, ирээдүйн мэргэжлээ зөв сонгоход дэмжлэг үзүүлэх, зэвсэгт хүчний залгамж халааг бэлтгэх, зэвсэгт хүчний үйл ажиллагааг сурталчилж, таниулах зорилгоор “Дөл” тэмцээнийг жил бүр уламжлал болгон ерөнхий боловсролын сургуулийн ахлах ангийнхны дунд зохион байгуулдаг уламжлалтай. Энэ жилийн тэмцээнд дүүргийн нийт 13 сургуулийн 1690 гаруй сурагч, 160 гаруй цэрэг-сурагчид хурд, хүч, авхаалж самбаа, мэдлэг чадвараа сорин өрсөлдөж аваргуудаа тодрууллаа.

“Дөл” тэмцээний шилдгүүдээр:

✅1-р байр: 23 дугаар сургуулийн “Элит 23” баг

✅2-р байр: 57 дугаар сургуулийн баг

✅3-р байр: 24 дүгээр сургуулийн “Хар сүлд” баг

✅“Шилдэг жагсаалын үзүүлэх тоглолттой тасаг” 23 дугаар сургууль

✅“Шилдэг жагсаалын 16 тоот дасгалтай тасаг” 5 дугаар сургууль

✅“Шилдэг галын бэлтгэлийн нормативын тасаг” 24 дугаар сургууль

✅“Шилдэг тасгийн захирагч” төрөлд 50 дүгээр сургууль

✅“Шилдэг хүн эмнэлгийн норматив”-ын төрөлд 39 дугаар сургууль

✅“Шилдэг байр зүйч” төрөлд 72 дугаар сургууль

✅“Шилдэг химийн норматив” төрөлд 17 дугаар сургууль тус тус шалгарлаа.